Na momento cu Reino Uni a registra 36.804 caso riba diaranson – esun di mas halto den e pandemia – gobierno ta papiando di decisionnan encuanto un lockdown mas fuerte.
Un otro variante di e virus (mutated) a wordo descubri na Reino Uni, na momento cu paisnan rond mundo a intensifica nan esfuersonan pa preveni transmisionnan di un variante detecta anteriormente di e virus, na un isla di e nacion. Autoridad di salud a informa cu e variante nobo di coronavirus probablemente a origina na Sur Africa.
Mientras cu a bisa cu e prome mutante lo ta 70% mas infeccioso cu SARS-CoV-2, e variante nobo (e di dos) ta transmiti mas lihe cu e prome.
E variante nobo a conduci na un aumento grandi den e infeccionnan na Sur Africa creando un di dos ola mas grandi.
Autoridadnan di Inglatera a informa cu cualkier persona cu tabata na Sur Africa e ultimo 14 dianan of tabata den contacto estrecho cu un persona di Sur Africa, mester bay di inmediato den cuarentena. A pidi tur esnan cu a bini di Sur Africa pa isola nan mes y ta bay anuncia restriccionnan di biahe pa Sur Africa.
E preocupacion pa e variante nobo aki ta pasobra e por pega un persona hopi mas lihe y ta parce cu el “mutate” mas leu cu e prome variante descubri na UK.
