Den 2020 AZV a haya nan tambe confronta cu un situacion menos agradabel. COVID a percura pa un presion grandi riba e fondo di AZV, pero mas ainda riba con ta organisa cuido medico na Aruba. Esaki a causa cu AZV a haya instruccion di Gobierno di Hulanda y di Aruba pa bay traha riba formanan con pa baha e gastonan di cuido medico. Esaki Solange Tchong, relacionista publico di AZV, a bisa durante un conferencia di prensa.
Esaki a resulta tambe den loke ta yama e Five Wave Model, unda cu ta bisa cu ta introduci diferente instrumento of medida cu por bay tuma pa asina por cumpli cu e cortamento di e 5 miyon florin pa luna den aña 2020, cual e total lo tabata e 35 miyon pa aña 2020.
Cu esaki AZV a cumpli, a ofrece e plan aki na Gobierno di Aruba y cu esaki e ora ey ta keda na Gobierno di Aruba pa bay evalua y avisa AZV e ora ey kico tur otro lo ta introduci pa loke ta e Five Wave Model.
Esaki tabata inclui cinco ola, di cual esun cu tabata abarca e mas hopi instrumentonan tabata ola cinco, unda cu a papia di diferente medida of cambio cu por haci pa asina toch salvaguardia e fondo di AZV y e cuido medico na Aruba.
Ta referi aki por ehempel na e ideanan cu tabata tin over di introduccion di un aporte propio, of un risico propio.
Tambe a papia di otro medidanan cual un di nan ta cambio den cobertura di e remedinan cu ta bay aden entrante 1 di februari 2021, cu ta un di nan cu sigur ta sali directamente for di e Five Wave Model, cual entretanto a adapta caba via ley.
Esey a tuma luga hunto cu e Advies Commissie Geneesmiddelenlijst Aruba (AGA), cu ta un comision cu ta traha pa duna conseho na minister di salud publico y cu ta duna conseho tambe na AZV riba e parti di remedinan cu tin riba e lista positivo di remedi di Aruba.
Bisando esey, AZV, hunto cu tur e dunadonan di cuido a percura tambe pa e cuido medico na Aruba por a sigui, sigur na hospital ta mira cu nan tabata tin un presion grandi den 2020 unda cu mester a adapta tur e procesonan, unda cu aunke e idea tabata pa sigui cu tur cuido, toch a haya nan confronta cu e situacion unda cu mester a adapta y dado momento y dirigi tur atencion na coronavirus, pasobra esaki a causa hopi caso. El a bira un situacion dado momento hasta alarmante cu a haci cu mester a para tur loke ta cuido electivo, esta cuido di pashentnan cu por warda, pashentnan cu por controla di un otro forma, pa asina toch por a duna prioridad na esnan cu a bira malo debi na coronavirus.
Esey a rekeri un cambio grandi di tur partido den sector medico, na unda a adapta totalmente na COVID-19, tanto pa loke ta reglanan di higiena, pero tambe tur otro paso cu mester a tuma luga.
