Fundacion pa Nos Comunidad (FPNC) a tene su evento anual di “Meal Package Event – Connect to Impact” cu ta un evento organisa dos biaha pa aña. Durante e evento empresanan local ta bin hunto den un ambiente ameno y ta duna nan aporte na preparacion di paketenan di alimentacion pa esnan den necesidad den nos comunidad.
Gianaika van der Biezen, Directora di Fundacion pa Nos Comunidad (FPNC), a splica cu e evento aki ta un union di diferente compania y organisacion, tur aportando na e bon causa pa preparacion di e paketenan di alimentacion pa e clientenan di FPNC.
Durante e evento a participa 40 compania, cada compania por a trece dies persona. E representante a indica cu tawata tin boluntarionan tambe presente cu a participa den e caso cu un compania cu a contribui na evento no tawata por ta presente, e boluntarionan tawata representa e respectivo companianan durante e actividad di “Meal package event.”
Van der Biezen e mustra cu FPNC ta yuda alrededor di 300 pa 350 famia entregando tur luna paketenan di alimentacion, tur esaki a base di donacionnan generoso cu ta ricibi.
E fundacion ta opera como un “NGO” (Non-Governmental Organization) y ta depende riba donacionnan di varios forma: companianan, comunidad, organisa eventonan, of cualkier otro forma cu por yega na fondo.
Directora di e fundacion a enfatisa cu: “Mirando cu ultimo tempo no ta facil pa por yega na fondo y donacion, a base di esaki ta organisa un meal package event”.
Tin dos meta durante e evento anual aki cu ta: “Teambuilding” e compania ta participa, pero alabes nan ta yuda na contribui na e paketenan tur luna. E otro meta ta: “Ta duna bek di curason na comunidad ” Tin biaha tin varios compania cu tin situacion financiero mas miho cu otro, pero tur ta coopera cu nan “granito de arena” pa e causa noble di yuda famianan den necesidad.
Ruthline Theysen, Director di Recurso Humano na Aruba Marriot & Stellaris Casino a mustra cu e actividad ta organisa pa FPNC y Aruba Marriot ta coopera cu e fundacion den diferente forma manera: ta sponsor e “ballroom” completo, “Food and Beverage” (F&B) , y a aporta cu tres mesa.
Theysen ta mustra cu ademas Aruba Marriott ta aporta na FPNC pa varios otro iniciativanan den cooperacion cu e fundacion di e hotel Marriott Care Foundation cu ta aporta financieramente pa yuda cu eventonan destina na yuda comunidad. E ehecutivo di e hotel a splica cu Aruba Marriott tin mas cu 10 aña ta trahando cu e fundacion y “ta hopi orguyoso di yuda di curason, tur asociado ta yudando durante nan tempo liber pa evento destina na yuda pa un bon causa”.
Ta di dos biaha cu Marriot Aruba ta participando na e “Meal Package Event”, pero e hotel tin un laso cu FPNC di hopi aña, specialmente durante temporada di fin di aña cu ta colecta basketnan pa famianan of otro iniciativanan.
E evento aki ta di dos biaha aki Marriot ta participa e evento specifico aki, pero Marriot tin hopi aña ta trahando cu FPNC specialmente durante temporada di fin di aña pa colecta basketnan pa famianan of otro iniciativanan
Gabriel Marchena ta labora como trahado social na FPNC, ta hopi contento di ta formando parti di evento aki. A splica cu a acerca diferente compania local y ta hopi contento cu nan participacion y ta duna palabranan di danki na tur cu ta aporta cu nan contribucion pa por sigui yuda e famianan den necesidad. Marchena ta mustra cu e fundacion ta yuda alrededor di 300 pa 350 famia di cual tur e alimentonan nutritivo ta bay den e pakete di alimentacion cu ta entrega na e respectivo famianan.
E trahado social di e fundacion dedica pa yuda famianan den comunidad di Aruba, a mustra cu FPNC ta traha hunto cu “ The Outreach Program” di Estados Unidos cu ta yuda e fundacion na Aruba pa medio di manda alimentonan den forma “bulk” (por mayor) pa Aruba, cu asina por pakete e productonan aki durante e “Meal Package Event”.
Cualkier empresa cu ta desea di participa n’e evento aki, por tuma contacto cu Fundacion pa Nos Comunidad y p’asina haya tur informacion.
