Riba 4 di mei tradicionalmente ta considera dos minuut di silencio den cuadro di e ceremonia conmemorativo ‘Dodenherdenking’ den henter Reino. Esaki en conmemoracion di tur esunnan cu den nomber di Reino Hulandes a perde nan bida of a wordo asesina durante e Segunda Guera Mundial. Tambe ta conmemora esunnan cu desde e tempo ey a perde nan bida den conflicto di guera of den e misionnan pa mantene paz.
Un dia unda ta para keto y duna tributo na tur esunnan cu a perde nan bida durante e di Dos Guerra Mundial. Ta recorda tur esunnan cu a entrega nan bida durante guera y den operacionnan den mantencion di paz.
A pesar cu Aruba no a participa directamente den e di Dos Guera Mundial manera Hulanda, e isla tin un conexion fuerte cu historia y tradicion Hulandes, incluyendo Dodenherdenking. Na Aruba, e dia di conmemoracion ta celebra cu respet y reverancia.
Durante e ceremonia a pone krans, algun dignatario ta duna un discurso y ta tene un momento di silencio pa mustra respet n’e esunnan cu a duna nan bida pa libertad.
Presente n’e ceremonia aki tabat’ey Gobernador di Aruba, S.E. Alfonso Boekhoudt, Prome Minister, mr. Evelyn Wever-Croes, Presidente di Parlamento, mr. Edgard Vrolijk y tambe Minister di Enseñansa y Deporte, Endy Croes. Tambe tabat’ey presente, Altocomisario di Cuerpo Polical Aruba, drs. Ramon Arnhem, Comandante di Marinierskazerne y Koninklijke Marechausee, Comandante di Arumil, y demas autoridadnan.
Na e ocasion a recorda tur esunnan cu a lucha den guera y ciudadanonan cu a perde nan bida den guera. No solamente den e di dos guera mundial, pero den tur guera, pa nunca lubida nan balentia y nan sacrificio pa nos libertad.
Prome Minister, mr. Evelyn Wever-Croes, den su discurso a indica cu “Respet pa otro ta un aspecto fundamental di mantencion di paz, tanto na nivel individual como nacional. E ta un principio cu tur hende mester brasa, ya cu e ta representa un deseo di largo plaso di un existencia pacifico. Ta evidente cu r sernan humano no ke biba den un estado di conflicto permanente.”
