Den ultimo dianan, mundo a observa cu curiosidad y un creciente alarma con e cientificonan di Reino Uni ta describi un variante recien identifica di e coronavirus cu parce ta pega mas lihe cu esnan ya conoci, ademas cu e ta geneticamente diferente.
E estudionan inicial di e variante nobo a pone cu prome minister Boris Johnson a bini cu mas restriccion pa temporada di Pasco y ta apela na autoridadnan di Hulanda, Alemania y otro nacionnan Europeo pa prohibi e biahenan for di Reino Uni.
Na e momentonan aki, e variante nobo ta e enfoke di debate intenso y analisis.
E variante di Reino Uni no ta un especie di un supervirus nobo. Solamente e ta un variacion di e tantonan cu a surgi mientras cu e coronavirus SARS-CoV-2 ta plamando na mundo. E mutacionnan ta surgi ora cu e virus ta replica su mes, y e variante aki – conoci como B.1.1.7— ya tin su mesun forma.
Kico e tin di straño?
E variante a hala atencion di investigadonan na december, ora cu el a cuminsa aparece cu mas frecuencia den e testnan saca den e regionnan zuid di Inglatera. Despues a bin saca afo cu esey tabata test saca di pashentnanfor di luna di september caba.
Ora cu e investigadonan a bay observa e genoma (Conhunto forma pa e material genetico di e DNA di e cromosomanan y di mitocondria), nan a keda impacta pa e cantidad di mutacionnan relativamente grandi cu el a desaroya: 23 en total. Mayoria di e mutacionnan cu surgi di coronavirus ta dañino pa e virus of no tin ningun efecto. Sinembargo, a haya e impresion cu varios mutacion den B.1.1.7 lo por afecta e forma di plama di e virus.
E ta mas contagioso cu otro virusnan?
Esaki parce di ta e caso. Den estudionan preliminar, e investigadonan di Reino Uno a constata cu e virus ta plama hopi lihe den cierto areanan zuid di Inglatera y cu el a tuma luga di un gran cantidad di variante cu a circula durante algun luna.
Sinembargo, e hecho cu un variante di e virus ta bira cada bes mas comun no ta prueba cu e ta plama cu mas velocidad cu otronan. E por ta plama pa loco. Por ehempel, por surgi un variante na un ciudad hopi pobla, unda cu por transmiti esaki facilmente y crea mas copia di su mes, loke ta normal.
Apesar di esey, e evidencia epidemiologico recogi te awo na Inglatera ta sugeri cu e variante aki ta hopi eficiente na momento di plama su mes. Den e areanan unda el a bira comun, e cantidad di casonan di coronavirus ta aumentando rapidamente.
E tasa di contagio di e variante aki ta varia entre 50 pa 70%, compara cu otro variantenan na Reino Uni di Inglatera.
Un variante nobo
Un serie di mutacionnan chikito haya den diferente testnan Britanico di coronairus por yuda cu e virus ta plama mas lihe. E variante ey ta conoci como B.1.1.7.
Tin cientificonan ta bisa cu e aumento di transmision ta debi cu e variante aki ta pega e muchanan mas lihe, compara cu esun original.
Pa confirma cu e variante ta mas contagioso, e investigadonan ta realisando experimento di laboratorio cu e meta pa observa mas di cerca con e ta afecta e celnan. E investigadonan ya caba a uza e experimentonan aki pa investiga un mutacion cu a surgi prome cu e pandemia, yama 614G. E variante aki a demostra cu e ta pasa pa ptro hende mas facil cu e otronan prome cu ne.
Pero e medidanan disciplina a funciona asina bon contra 614G como cu otro variantenan. E mesun cos por sosode cu B.1.1.7. “Segun loke nos sa caba, e ta cambia e eficacia di distanciamento social, uzo di tapaboca, labamento di man, uza di hand sanitizer y ventilacion, segun specialista di malesanan infeccioso Muge Cevik.
E ta causa un malesa mas grave?
No tin evidencia definitivo cu ta confirma esaki, por lo menos no pa awo. No obstante, tin motibo pa tuma e posibilidad na serio. Na Sur Africa, a surgi otro variante di coronavirus, cu tambe ta haya den B.1.1.7. E variante aki ta plama hopi lihe na e zona costero di Sur Africa. Den estudionan preliminar, dokternan a descubri cu e hendenan infecta cu e variante aki ta portador di un carga viral mas pisal un concentracion mas halto di e virus den nan tracto respiratorio (ariba). Den hopi malesa viral, esaki ta asocia cu sintomanan mas grave.
Di unda e variante inusual aki ta bini?
Tin un debate intenso rond di e pregunta aki. Un posibilidad ta cu e variante a desaroya su serie di mutacionnan nobo den un otro set di virus.
Den un infeccion normal, un persona ta haya coronavirus y ta bira contagioso durante algun dia prome cu manifesta sintomanan. Despues, e virus ta bira menos abundante den e curpa, segun e sistema inmunologico cu ta lidera e defensa. A menos cu e pashentnan sufri un caso grave di VODI-19, nan ta bira completamente liber di e virus den algun siman.
Pero, tin biaha e virus ta afecta hende cu un sistema inmunologico debil. Den nan curpa, e virus por keda desaroya durante hopi luna. Estudio haci riba e personanan aki a demostra cu e virus por acumula un gran cantidad di mutacion ora cu e replica den nan curpa durante un temporada largo.
Otro cientificonan a señala cu e virus kisas a desaroya mutacionnan nobo ora cu nan plama via di cierto tipo di animal, prome cu nan a bolbe drenta den contacto cu e poblacion humano.
