Awendia tin hopi tipo di consehero, tin hasta consehero di desaster, pasobra un bon consehero semper ta busca e oportunidad pa reconcilia hende, mescos cu Dios a haci den 2 Corintionan capitulo 5 vers 19.
Si un hoben ta den rebeldia contra su mayornan, bo no por conseh’e bay biba cerca amigo/amiga, absolutamente cu no, e hoben ey mester practica Efesios capitulo 6 vers 1, y ta asina so cos por bay bon den su bida pasobra esey ta un mandato y promesa di Dios.
Ora ta trata di problema den matrimonio, cuminsa splica e pareha cu locual Dios a uni no laga ningun hende separa (Mateo 19:6).
Un consehero cu conoce e palabra di Dios, mester haya un manera pa aplica e palabra di Dios den e situacion cu presenta y confia Dios pa no yega na divorcio.
Esey ta nifica cu pa medio di oracion bo mester comunica cu Dios prome cu conseha hende y no conseha hende for di bo propio experiencia.
Bo por haya tur sorto di rikesa den un cas, mas si den e hogar ey, e palabra Pordon no ta biba, e cas y su habitantenan ta pober. Pasobra caminda no tin pordon no tin crecemento, y pa falta di pordon hopi hende ta cana bou di stress, depresion y ta hasta sufri mentalmente.
Miho bo ta biba den un casita caminda tin amor y pordon y no biba den un mansion caminda hende no ta papia cu otro, pasobra no ta e grandura di e cas ta determina bo Felicidad.
Proverbionan 21:30 ta bisa: No tin sabiduria, ni comprondemento, ni conseho contra Señor.
Ora un hende ta duna conseho, ta bon pa observa si e conseho aki ta bay contra e palabra di Dios, si e consehero aki tin temor di Dios, pasobra tur conseho cu ta bay contra e palabra di Dios ta falso y ta un pica.
Esaki ta specialmente pa nos hobennan pa nan habri wowo, riba conseho pa violencia, conseho pa vengansa, conseho pa odia y mata, tur e tipo di consehonan aki ta abominabel den bista di Dios.
Dicon nos mester pordona? Pasobra caminda tin pordon tin arepentimento, y caminda tin arepentimento Dios ta drenta, pasobra falta di pordon ta kibra comunicacion cu Dios, y asina haci e situacion pio (Mateo 6 :14+15).
Cuanto hende no ta canando preso riba caya pasobra nan no kier pordona, cuanto hende ta biba cu relacion kibra pasobra nan no kier pordona, y cuanto mucha no ta traumatisa pasobra nan mayornan no kier pordona otro.
Un conseho pa pordona ta bini di trono di Dios, pasobra Dios a pordona nos tur , ora nos ta bisa cu mi ta pordona, pero mi no ta lubida, esey ta nifica cu nos no a pordona, ta nifica cu nos ta keda cu e persona riba nos curazon, y den cualkier momento cu presenta nos por lanta e problema bieuw atrobe.
Den tur situacion nos mester busca un oportunidad pa pordona otro mescos cu Dios a pordona nos, y a libra nos di tur maldad.
Skirbi pa Pastor Marcel Balootje