Kiwanis Club of Palm Beach a anuncia diahuebs mainta su evento Ride4Kids cual lo ta e di dos edicion. E ta un fundraising cu a cuminsa aña pasa durante pandemia y e aña aki, debi n’e exito di aña pasa, lo ripiti esaki.
Esaki tambe lo bay bira algo anual.
Segun Rodhmar Coenraad, presidente di e club, a splica cu e iniciativa a bin fo’i algun miembro cu ta hopi activo pa haci algo durante pandemia y core riba bicicleta, recaudando fondo. Mirando e exito, e aña aki tin 12 miembro di Kiwanis Palm Beach cu lo bay core pa recauda fondo rond di Aruba.
Director di SKOA, Anuesca Baly, a comenta cu aña pasa, durante pandemia a acerca y a haya yudansa di Kiwanis Palm Beach pa alumno cu mayornan no por a cumpli cu e rekisito di pago di e aña escolar. E aña aki ainda ta den pandemia y semper ta keda cu un grupo di alumno cu e mayornan no por cumpli cu e pago aki.
E aña escolar aki, Kiwanis Palm Beach a acerca SKOA un biaha mas, cu e idea aki cu ta uno fabuloso, pa un biaha mas por sostene e alumnonan di menos recurso, pa asina e mayornan tin un peso menos riba nan cabes e aña escolar aki, cual ta e schoolgeld.
Pa loke ta screening, SKOA ta haci un screening via di nan trahadonan social y tambe via e cabesante di e diferente scolnan.
Pa SKOA esaki ta un parti cu nan ta duna bek como un instancia catolico cu ta duna enseñansa catolico na nan scolnan.
Kiwanis Palm Beach tin nan meta. Pero sin ayudo di comunidad, no por haci esaki. Tin diferente manera cu por contribui n’e causa aki. Naturalmente via di nan pagina di Facebook, nan lo anuncia esaki. Por sigui e instruccionnan con por haci un donacion n’e causa. Por haci un donacion pa un suma fiho of un suma pa kilometer. Obviamente si reta e presidente, mester paga 150 biaha e suma, pasobra e lo core 150 kilometer. Esey ta un reto cu e mes a pone pa su mes.
Prepara pa diadomingo, dia 28 di november, unda cu lo cuminsa pa 3:00 am y lo bay finalisa pa 10:30 am. Si ta bon tur hende cu lo ta coriendo lo yega bek na nan club. Trayectorio ta cuminsa y caba n’e Clubhuis di Kiwanis situa den Neptaly Henriquez Park y lo cubri Aruba completo.
Pa un cobertura mas amplio lesa e edicion di TREMPAN di mañan.
