Ultimo tempo por a nota cu tin varios hotel cu ta den problema. Sea cu Aqualectra ta cera nan awa y coriente y tin otro hotelnan cu a cera nan porta.
Miles Mercera, director di CHATA, a splica cu si mira den su totalidad, tabata tin un crecemento di camber na Corsou. Tin cuater hotel cu a pasa den situacion tiki dificil, pero esaki sigur no ta representativo di henter e sector di turismo na Corsou.
Tin cu compronde cu tin rond di 7500 camber disponibel pa aña pa por bende cu turista. Di esakinan, e cuaternan aki ta representa rond di 300 camber. Di e cuater hotelnan aki tin cu compronde tambe ta un situacion priva caminda cu e hotel, como un instancia priva ta pasando den un situacion dificil, sea cu debenan atrasa, of cu situacion caminda cu e ta para na benta. Esaki sigur no ta parti di e proceso hotelero, cual CHATA ta promove awor aki.
Hotelnan den centro
Tin dos cera awor aki den centro, uno na Punda y otro na Otrabanda. Segun Mercera, e dos hotelnan aki, hunto cu e otro dosnan tambe, ta algo cu sigur di loke nan posicion ta, lo wordo bendi pronto y lo haya un doño nobo cu por inverti bek den e hotel. E cuater hotelnan aki no por a sigui opera bao di e tipo di calidad di producto cu nan tabata ofrece ultimo añanan aki. Ta hotelnan cu sigur mester wordo renoba. Ta hotelnan cu sigur tambe tabata buscando doño caba pa hopi aña caba. Ta un proceso masha normal, den bo product lifestyle, manera cu e ta wordo indica. Bo desaroyo di bo producto ta pasa den dje. E cuater hotelnan aki ta e hotelnan cu tin cu pasa pa doñonan nobo y pa futuro esey ta loke CHATA premira, caminda ta bay haci tur esfuerso pa haya tambe doñonan nobo cu lo kier inverti bek den e producto, pa e hotelnan habri mas pronto posibel.
Otro hotelnan
Segun Mercera, ainda CHATA no ta na altura di otro hotelnan den problema. Contrario, nan a mira crecemente den ocupacion den 2018, compara cu e ultimo cuater añanan, caminda cu a yega casi 80% di ocupacion for di Januari te cu awor aki. Tambe a mira un crecemento den prijs pa anochi. Tin cu compronde cu riba e 7500 camber a mira un aumento di demanda pa loke ta ocupacion, pa loke ta prijs pa camber pa anochi y e REVPAR, cual ta indicatorionan hopi importante na momento cu bo ta midi e performance di un sector turistico.
Turismo en general
Turismo di Corsou ta constantemente den desaroyo. E ta un sector relativamente hoben, compara cu e otro sectornan na Corsou. Pero tambe si bo compara Corsou cu e resto di Caribe. Turismo ta up and coming na Corsou. Ta un sector cu tin hopi potencial. Tin awor aki 11 mil hende cu ta trahando directo y/of indirecto den e sector turistico. E ta contribui casi cu 25% di nan GDP y tin e potencial pa sigui crece.
Ponencia di CHATA ta cu e sector di turismo ta e sector cu lo sigui duna fruta. Ta e sector tambe pa loke ta short term lo contribui na e desaroyo economico den su totalidad na Corsou. Tambe ta e sector caminda mas cupo di trabao lo wordo crea mas pronto posibel. Teniendo esaki na cuenta y mirando e perspectivanan pa loke ta futuro, si mira riba e parti di airlift, e aumento grandi cu tabata tin, mas di capacidad di avion cu ta bin Corsou e aña aki y otro aña, Pero tambe si bo wak e cantidad di cambernan cu a bin ta crece ultimo añanan aki, tur esakinan ta un impacto positivo pa loke ta desaroyo di turismo. Esaki tambe, hunto cu aeropuerto cu tambe ta pasando den su renobacion, ta loke a prepara infrastructura pa por acapara turistanan den un aña. Pa loke ta futuro sigur, ta mir’e sigur como positivo y tin tur e ingredientenan tambe disponibel awor aki pa por sigui crece.
