Ta asina ku mi a keda aserka pa algun mayor i shofùrnan di bus preokupá pa e echo ku ta hopi difísil pa nan yunan por hasi uso optimal di transporte públiko esta konvoi.
Den e kuadro aki nos a disidí na hasi un análisis riba e puntonan ku nos a risibí, dor di bai opservá e puntonan ku a keda trese dilanti.
Punto nan ku a sobresalí ta e echo ku e konvoi òf bus ta pasa na sierto orario stipulá ku ta kai sea muchu mas promé ku e skol terminá òf mas ku un ora despues ku skol terminá. Esaki tin komo konsekuensia ku si e konvoi pasa trempan i e yu a kaba sinku pasa di unu e tin ku warda te 2’or ora ku e siguiente konvoi pasa, ademas e konvoi ta pasa asina yen ku komo konsekuensia ku mester keda warda riba e siguiente konvoi ku ta bolbe pasa te despues di un ora pa e studiante por yega kas. Esaki debí ku e konvoi no ta un konvoi ku ta transportá muchanan di skol so, pero tambe públiko en general. Esaki tambe ta konta pa mainta ora di kue e konvoi pa bai skol tambe, e ta pasa yen anto muchanan mester warda riba esun di 1 ora despues i konsekuentemente ta yega skol lat.
Tambe a bin dilanti e echo ku despues ku gobièrnu a parti karchi di konvoi, ainda tin basta hóben ku no a risibí karchi di konvoi ainda. A stòp e bùsnan chikí ku tabata rekohé muchanan den área di banda bou konsekuentemente e muchanan aki mester kana bai ta na un bòrchi di bus pa kue konvoi. Meskos ku ora di bin kas bek ya e mucha no ta wòrdu baha mas serka di su kas, pero e mester kana den solo kayente pa yega su kas. Ku e desishon aki ademas a kita un entrada for di e shofùrnan di e busnan chikí.
A base di esaki nos kier hasi e siguiente preguntanan na Minister Jesus-Leito konforme artíkulo 96 di Reglamento di Orden di Parlamento;
Preguntanan:
- Kiko ta e motibu ku a stòp e bùsnan dediká na esaki, di banda bou pa transportá muchanan di skol?
- Kiko ta e intenshon o siguiente paso pa ku e desishon aki despues ku a tuma medida pa spar sèn pa asina tapa burakunan di défisit, tin un plan diferente ku ta remediá e implementashon aktual ku ta kanando robes ?
- Den kuantu tempu e muchanan ku no a risibí karchi di konvoi lo risibí esaki i na unda nan mester bai pa buska e karchi, mirando ku aña eskolar tin 1 luna kaba di a kuminsá?
- Ta bai bin un solushon inmediato pa evitá ku hóbennan ta keda para na bòrchi pa warda konvoi i ta yega skol lat òf ta yega kas lat sin por avansá ku nan tareanan?
- Lo no por stipulá sierto orario pa konvoinan buska muchanan di skol so òf pone algun konvoi (mas grandi) den orarionan trempan di dia i mèrdia pa spesífikamente kumpli ku hóbennan ku tin bai skol i bin bek?
- Pa skolnan ku ta keda mas leu di e bòrchi i e hóbennan aki lo tin ku kana basta pa por yega e bòrchi i ku konsekuensia ku nan ta pèrdè e konvoi lo tin un solushon?
Frakshon di MFK representá den e kaso aki pa Parlamentario Gilbert Doran ta spera di haña kontesta mas pronto ku ta posibel, pa asina alumnonan i pueblo di Kòrsou por wòrdu informá riba e aspekto aki di transporte eskolar i nan por tin trankilidat ku esaki lo wòrdu regla pa eliminá e problemanan ku tin aktualmente.