Den varios di mi analisisnan den pasado pa 24Ora, a indica cu e moneda di Europa, esta e Euro tin problema severo riba ambos termino largo y mediano. Riba dia 15 di april, 2022 mi prome articulo riba 24ora riba e tema aki, nos a papia den forma detaya riba e factornan di termino largo. Enberdad e Euro a cay bou di $1 den e lunanan cu a sigui, te na un nivel di $0.954.
Dia 11 di mei, 2023, nos ta wak e Euro atrobe riba un nivel di $1.09. Den e analisis aki, nos lo discuti dicon mi persona ta pensa cu e moneda Europeo probablemente lo cay bou di $1 den e lunanan binidero. Debi n’e problemanan fundamental sumamente negativo di termino largo y un analisis di e factornan den termino inmediato.
Un fundeshi sumamente suak
Debi na un cocktail di factor complica di cultura, finansa publico, finansa priva y e maneho riba nivel nacional y supranacional na Brussels, a crea un situaccion di un moneda cu den mi opinion ta basa riba un fundeshi di santo fini.
Pa ilustra esaki nos por simplemente wak e debe naccional di e paisnan manera Italia y estado di accion di banco Europeo. Recientemente hopi atencion den media a bay p’e problemanan di banco na Merca. Aunke esaki ta hopi relevante, mi persona ta sinti cu media mester pone mas atencion riba e situaccion espantoso di e banconan Europeo. No lubida cu 6 siman pasa Credit Suisse, un banco sumamente grandi a collapse den forma total.
Nos a wak banco manera Deutsche Bank y Commerzbank, cu ta institucion financiero di un tamaño masivo. Europa su “Mega Banks” ta unda ami ta wak cu e problemanan espantoso lo por surgi, supuestamente “onverwachts”.
Economia global bou presion
E moneda Euro ta normalmente baha ora cu economia global slow y specialmente si drenta un recesion global. Si nos wak varios herment sofistica, ambos den forma absoluto economia di mundo ta bezig ta cay. Pero tambe Europa su economia lo ta esun cu lo sufri mas hopi relativamente na esun di e partner Merca.
Analisis di sintimento bou di e fondonan
Uzando herment y analisis sofistica nos por wak cu relativamente cu historia, cu mayoria fondo ta kere cu Euro lo sigui hisa. Hopi biaha esaki ta un fundeshi pa hustamente e contrario sosode, door cu tur hende a bet caba.
Factor tecnico inmediato: prijs pa cay
Un analisis di e prijs uzando trendlines, moving averages, MACD y RSI indicadonan ta indicando na mi persona cu prijs di Euro lo cuminsa cay den forma inmediato e siman y e lunanan cu ta bin.
Mi ta di pensamento cu Euro atrobe lo bishita e nivel di $0.95 versus e dollar Mericano.
Riba termino mas largo nos lo por wak prijs mas abou cu esaki.
Debi n’e factornan fundamental sumamente negativo. Den mi bista esaki lo por causa un segundo “Euro Debt Crisis” cu lo concentra su mes na “Mega Banks” Europeo mane Deutsche Bank, Commerzbank y Santander.
Disclaimer:
Esaki no ta aviso pa specula den ningun manera. E articulo aki ta solamente e opinion di e autor. Autor no ta responsibel pa ningun forma di daño financiero cu por surgi.
