Diahuebs anochi a tuma luga e ceremonia di despedida di Theodoor Santiago Farro, miho conoci como “Dodo di Ina”. Un publico grandi a bay tuma despedida di dje na Aurora Funeral Home. Pero, hopi no a prepara pa topa cu Dodo sinta riba su motorcycle marca Harley Davidson. E tabata un amante fiel di su motorcycle y tabata, te na september 2022, e “rider” mas bieu di Aruba, e tempo ey cu 91 aña di edad.
Dodo Farro ta un ex-trahado di ACI, di Ministerraad y tabata un duanero. El a nace dia 26 di maart 1931 y a fayece dia 3 di mei 2023. El a bay laga atras su yiunan Ludwina “Winnie” y †Andre Pak-Farro, Maria Farro, Stella Farro, Frida y †Jossy La Rosa-Farro, Lita Farro, Robert Farro y Paulita Maduro, Theodoor “Doy” Farro y Deta Rasmijn, Irma y Franklin Eckmeyer-Farro, Albertico ‘Tico” Farro y Corrie Broekhuizen, Milca y Tico Tromp-Farro y Richi Kock.
Tambe a bay laga un cantidad di nieto, cu a stim’e hopi, esta Patricia Pak y famia, Carolina Pak y famia, Natasha Pak y famia, †Enid Tromp-Delle y famia, Norman Delle, Siegfried Kelly y famia, Francis Joëll La Rosa y famia, Jacqueline La Rosa y famia, Jessica Figaroa-Farro y famia, Stefano Farro, Franco Eckmeyer, Franklin Eckmeyer y famia, Cathline Eckmeyer y famia, Alberto Farro y famia, Nathalie Farro, Liliana Farro, We-Ling Tromp y famia, Mai Sai Tromp y famia, Raize-Ling Tromp y Famia, Nai-Ling Tromp y famia, Makanaki Tromp y Ryan Irausquin.
Su nieta stima, Wei-Ling Tromp, a conta nos cu su welo ta un homber cu a biba su bida, te na ultimo. E tabata fanatico grandi di e deporte di biyar, domino y a encanta su coremento di Harley Davidson. El a yuda funda algun di e gruponan pero tabata participa den tur. E ultimo añanan, como cu e tabata e coredo di mas bieu, semper nan tabata invit’e y e ta bay tur careda. Tur dia e Harley ta subi caya, maske ta pa un rato.
Na dado momento, ora cu curpa a cuminsa haya complicacion, a bira poco dificil p’e pa por a sigui maneha su motorcycle. Su yiunan a percura pa cambia e vehiculo, cu tabata maneha riba dos wiel, pa core riba tres wiel. Claro cu e ora henter e forma di maneha a bira mas facil p’e y e por a sigui keiro sin ningun problema.
Ora cu el a cuminsa confronta retonan cu su salud, el a expresa su deseonan na su yiunan. Esun di mas grandi, a cumpli cu ne, esta si subi un crucero cu tur su yiunan hunto. Lamentablemente a cumpli parcialmente cu e deseo pasobra tabata net riba e crucero mes cu el a sinti su curpa malo, cu a opta pa e baha y regresa Aruba.
Aki el a cuminsa prepara tur cos pa su entiero. El a laga su yiunan y su nietonan sa precies kico e kier, con e kier nan organis’e y tur cos. Y famia ta contento di un banda di por a cumpli cu tur su deseonan. Nan ta gradici tur hende cu a pasa despedi di dje, cu sin duda ta sirbi como forsa pa tur ser keri cu a keda atras awo den tristesa.
