E echo cu Parlamentario Alvin Molina ta critica su mesun gobierno, ta duna nos speransa cu un dia nos lo tin un Parlamento eficiente y cu di berdad ta controla gobierno. Esey pa hopi decada, casi no ta existi. Pero, e motibo pakico e parlamentario di MEP ta cuestiona su mesun coalicion, ta pasobra cu e minister di Raiz no kier cera un “deal” cu un experto di agricultura. Pio ainda, e parlamentario, cu mester controla gobierno, tabata sinta na mesa di “negosacion” cu dos minister!
Alvin Molina, siendo un ex-altoinspector di polis mester por sa miho, cu ta existi separacion di poder. Si e no tabata sinta den dicho reunion, tampoco no lo a hustifica su critica, pero por lo menos e lo no tabata asina cerca di e candela. Pero awor no, awo e ta sinta den e candela su mes tambe y ta mustra mas bien cu e kier “yuda” of pusha e minister pa cera un deal cu e compania of entidad cu kier brinda Aruba sosten riba e materia di plantamento.
Claro cu tur hende lo desea pa nos por explora e posibilidadnan di plantamento mas na Aruba. Pero pa awo, ta companianan priva tin beneficio directo pa cu e negoshi aki y ta sinti cu mas bien e parlamentario di MEP ta purba eherce su poder pa pone presion riba Raiz pa cera deal cu un comerciante. Ta bisa comerciante pasobra na final, sea ken sea e experto aki ta, gobierno lo mester pag’e.
Gabinete Wever-Croes I a sinta cuater aña largo y ningun dia Minister Chris Romero no a pensa den cera un deal asina pa promove mas agricultura. Es mas, Romero tabata minister ora cu pandemia a bati na nos porta y ni esey a conducie na cera e tipo di acuerdonan asina pa por promove mas plantamento na Aruba mes. Awor cu na november 2021 e gabinete nobo a sinta, awo ta purbando pa pone presion pa Raiz scoge e decision cu MEP kier, sino ta critica den media.
E ta un tendencia peligroso ora cu parlamentario ta mete den decisionnan na nivel gubernamental. Parlamento mester laga gobierno funciona y critica nan ora cu nan no ta sigui e maneho priminti ora e trata presupuesto aña pasa. Pero, pa un parlamentario tene man di un entidad of comerciante pa hib’e Cocolishi, pone sinta cu un minister di MEP y un di Raiz…y ora cu e “deal” no keda cla ainda, ta sali ataca…ta mustra un cara robes di nos Parlamento di Aruba.
Parlamentario Alvin Molina di e Fraccion di MEP a bisa cu el a reuni cu varios experto internacionalmente reconoci cu ta dispuesto pa yuda prepara Aruba y su gobierno pa e reto grandi di garantisa “food security”. Un di nan ta dr. Andre Thomas di Barbados, Embahador di United Nations, miembro di CARICOM y un experto riba tereno di agricultura. Dr. Thomas a reuni cu varios instancia na Aruba y tambe cu minister-president y minister Ursell Arends na november 2022. E parlamentario ta critica cu ainda Minister Arends, encarga cu sector primario, no a tuma paso pa haci uzo di e oferta di dr. Thomas cu por yuda nos desaroya un industria den agricultura. E ta haya cu tanten nos no planta e simia, sigur nos lo no tin cosecha. “A yega tempo pa nos tuma accionnan berdadero y duradero.”
Alvin Molina ta naci na Aruba y a studia na Colegio Arubano VWO, a sigui pa su estudio na Nederlandse Politie Academie na Appeldoorn y a regresa Aruba pa bira inspector di polis. Entretanto el a cumpli 19 aña como polis, semper den un posicion di maneho y strategia. El a drenta arena politico. Den su prome salida, Alvin Molina a haya # 10 riba e lista di partido MEP. A participa den eleccion na juni 2021 y a logra no menos di 257 voto riba su nomber. Durante su campaña electoral, a dedica hopi atencion for di unda e mes ta bin, esta San Nicolas. Cu salida di Chris Romero for di lista, a bin espacio pa un politico nobo cu e conviccion pa trece cambio y di ta un bos pa e barionan pariba di brug.
