Energia ta un di e factornan mas grandi directo y indirecto pa costo di bida.
Riba nivel global, si energia ta caro (prijs di petroleo, fuel oil), tur cos na Aruba ta hisa. Esaki nos a sinti den manera obvio e delaster aña aki. Tambe den manera directo si prijs di coriente y awa hisa, tur cos lo bira mas caro un bes mas.
Riba termino corto esaki ta doloroso, pero riba un termino mas largo tin hopi indicacion pa ta sumamente optimista.
Den e articulo aki nos lo discuti differente tecnologia innovativo mes, manera e generacion mas nobo di tecnologia solar, verf innovativo, glas insolente y airco eficiente.
Nos solo briyante y e generacion nobo di energia solar
Ya caba hopi hende a cuminsa opta pa energia solar.
E panelnan solar na Aruba ta basa riba e prome generaccion di tecnologia cu ta cristaline silicon. Pero cristaline silicon ta relativamente caro pa produci y tin un limite di eficiencia di 27%.
E panels di awo mas avansa comercial di silicon a yega un eficiencia di 25%. Dus no tin mucho espacio mas pa progresa e tecnologia aki riba termino largo.
Un di e materialnan mas inspirativo na e momento aki den espacio di tecnologia solar ta “Perovskite”, e material aki ta uno di costo extremamente abou y ta hopi mas “ecofriendly” pa produci. Tambe e limite teoretico di eficiencia di Perovskite ta 32% cual ta mas halto cu silicon.
Riba termino largo panels basa 100% riba Perovskite lo bin, pero tin varios dificultad den con pa tene e panels aki traha pa 15-20 aña cual ta e standard industrial. Riba termino mas cortico y lihe e combinacion di Perovskite cu Silicon dual panels ta uno cu ta casi yega comercialisacion.
Ayera mes NREL na Merca a anuncia un record di 31.2% eficiencia di un dual Perovskite-Silicon panel.
Simon, tur e informacion aki ta leuk pa sa. Pero kico e lo kiermen pa mi persona?
Wel, un analisis hopi amplio di Zongqi Li et al. na 2018 a mustra cu un Perovskite-Silicon panel na eficiencia abou di 22% por crea coriente pa 5.22 cent US,- per KwH incluso tur costo di e panel. Pa compara; Elmar ta cobra 17.2 cent US per KwH pa hende regular. Esaki ya caba kiermen un reduccion den prijs di coriente di 70%!
Awo, tin experimento innovativo cu material hopi sofistica yama “metamaterials”
Si por hisa e eficiencia di Perovskite y los op e dificultadnan tecnico di durabilidad, e analisis di Zongqi Li et al. 2018, ta mustra posibilidad pa prijsnan di 3 cent US,- per KwH, pues 83% mas barata cu coriente di Elmar.
Tene cas na dushi temperatura di generacion nobo
Pa mayoria lector y comerciante e costo mas grandi di electricidad ta pa tene un cas of edificio na un temperatura agradabel. Pa cu esaki un generacion nobo di innovacion tambe ta brinda hopi speransa.
Glass Anti-Solar Heat “e Glass”.
60% di temperatura cayente di un edificio ta bin via bentana. Glas estilo “e Glass” ta laga luz visibel drenta pero ta blokia e infrared.
Diferente experimento ta mustra cu e ta baha solar radiation den edificio, dus cayente ta drenta cu 62%.
Verf Special
Loh et al. 2010 di Universidad di Sao Paolo a traha un verf innovativo cu pigment special.
Su experimentonan a mustra cu un edificio cu e verf special aki ta 10 grado Celcius menos cayente riba su mes!
Airco Super Zuinig
En fin, si un airco ta even necesario, e generacion mas nobo di airco cual un ehempel di esaki ta uno cu researcher Ernest Chua a design ta 30% mas zuinig cu airco mas eficiente riba mercado awo.
Conclusion
E combinacion di energia solar basa riba Perovskite, e Glass, Verf Special y Airco Ultra Zuinig lo den futuro yuda reduci gasto di coriente pa ful Aruba den un manera casi no por imagina.
Uzando ful e combinaccion por reduci casto di coriente yegando 90%!!
