Diasabra anochi fanaticada di ERA, Musical Time y OREO a bini hunto den Marriott Ballroom pa celebra e 40 aña di ERA Autentiko. Yazira Javois-Feliciana di Aruba Marriott Resort & Casino a comenta cu nan ta sumamente satisfecho, diasabra tabata e di dos anochi cu ERA a presenta na Marriott pa celebra.
Alabes Yazira a menciona cu e fiesta aki tabata “sold out” for di algun dia caba y esaki e refleha den e ballroom cu tabata completamente yen. Diabierna anochi a presenta ERA conhuntamente cu Musical Time, diasabra anochi a agrega OREO den e repertorio.
Mirando cu ambos anochi tabata exitoso, a scoge pa duna e publico fanatico un chens mas di presencia ERA completamente gratis.
Tres compania a cera cabes y hacie posibel pa pueblo disfruta di e banda ERA for di Corsou. Brouwerij Nacional Balashi, Stellaris Casino y High Performance a cera cabes y organisa e concierto den curason di San Nicolas. E evento lo tuma luga na Neighba, riba Bernhardstraat, net pariba di ex-Hong Kong Supermarket. Tur cos lo cuminsa pa 6:00 pm. Durante e evento por disfruta di e platonan sabroso di Neighba y e cerbesnan bon friu di Balashi.
Awe diadomingo unicamente ERA lo ta presente na Neigba.
