Ta parce cu e compania Sociedad Area de Ibague (SADI) y Gobierno di Aruba a yega na un crusada dificil, apenas algun siman despues cu a celebra e hecho cu a scoge e compania di Colombia pa ofrece servicio di Helicopter na Cuerpo Policial Aruba. E reto riba mesa awor ta gastonan extra cu a presenta, cu e compania no por of kier asumi. E gerente, Carlos Eduardo Restrepo Osorio hunto cu esun cu ta firma e compromisonan na Aruba, esta Sonia Restrepo, ta aki pa busca un solucion of kibra e contract. SADI ta evaluando pa demanda Gobierno di Aruba, pa no cumplimento cu e contract firma cu nan.
Fuentenan cerca di e problema a indica cu den e contract entre Gobierno y SADI ta stipula cu e Helicopter di Polis por yena combustibel unda cu nan kier. Consecuentemente e compania a tene esey na cuenta den nan oferta na Gobierno. Pero awor cu a start operacion, ta obliga nan pa yena combustibel na Aeropuerto priva. Ey mester paga pa aterisa y pa lanta buelo bek, separa di e combustibel. E gasto ey, balora na 20 mil dollar Mericano pa luna no ta inclui den e oferta y como tal ta bay den operacion di e compania Colombiano.
Gerencia di e compania ta determina pa bringa e asunto aki, pasobra nan no ta di acuerdo cu Gobierno ta acorda algo cu nan y despues via Aeropuerto ta cambia e acuerdo y consecuentemente hincando e compania den mas gasto innecesario. Nan abogado y representante na Aruba ta e propio abogado mr. Dello Gomez, amigo y consehero principal di Minister Andin Bikker, cu ta esun cu a cera e acuerdo cu e compania. Como cu ta sinti cu ta mandando nan di cashi pa muraya, a opta pa duna Gobierno 48 ora pa soluciona e problema aki, sino nan ta hiba e Helicopter bek Bogota y lo start un caso civil contra Gobierno pa no cumplimento.
E solucion riba mesa awor ta cu e helicopter ta haya un tanki di combustibel na Kazerne di Brandweer na Tanki Flip mes y cu nan mes ta yena nan combustibel eynan. Cu esey nan lo paga menos na combustibel y lo no mester paga pa ateriza y lanta vuelo bek. Den caso cu Gobierno no acepta e solucion ey, nan lo mester ta habri pa aumenta e suma di contract pa uzo di e helicopter.
Ya caba e compania SADI no tabata esun mas barata den e destaho. Nan a “bid” pa 324.000 florin pa luna, siendo cu den pasado, Gobierno tabata paga 100.000 pa luna pa huur di helicopter. Si inclui tarifanan adicional awor y prijs di combustibel ahusta, por saca afor cu e helicopter awor ta costa 3 biaha mas cu e acuerdo cera pa ex Minister Rudy Croes di MEP entre aña 2003 pa 2014. E forma con a otorga e trabou aki pa SADI, desviando for di un destaho “publico” cu 15 compania participante y despues Gobierno ta bira scoge un di e participantenan, ta un topico apart cu nos lo amplia riba dje dentro di poco. Den esey lo por spera casonan civil contra Gobierno y contra Minister Andin Bikker personalmente pa decisionnan dudoso cu el a tuma, sin lubida e aspecto di conflicto di interes den e mesun asunto aki.
