Diadomingo ultimo e gran Torneo di Copa Noord a continua riba veld di Centro di Bario Noord.
Un Torneo cu a inicia 5 siman pasa cu weganan competitivo tur diasabra y diadormingo a drenta su recta final na momento cu Diasabra e 8 equiponan cu a clasifica a elimina otro pa saca 4 ganador kendenan lo continua diadomingo.
Diasabra merdia Calabas Blue Jays a elimina Montaña Braves, despues Royal Power ta elimina Bad Boys, Tanki Leendert Giants organisadornan di e torneo ta bounce bek di 11-3 pa elimina Pizza Hut Redskins campeon di 2017 cu score di 15-13 y ta manda nan cas mientras Kudawecha Indians ta elimina Superplus pa continua pa diadomingo.
Diadomingo merdia 12pm Royal Power ta enfrenta Calabas Blue Jays den un wega di un pa tera y un pa lama. Royal Power como equipo visitante a anota 2 careda den promer inning pero mesora Calabas ta responde y ta pika ariba 3-2. Royal Power ta rally bay ariba 5-3 y ta rally pa 4 careda mas den top di 5 inning y ta score dos careda mas pa segura e wega den top di 7 inning.
Kenny Hart ta fildea un foul fly den waya di right fielder bati pa Randy Paredes den bom di 7 inning na un manera sensacional pa celebra e victoria mandando Calabas Blue Jays cas kendenan porcierto a perde nan promer wega y ta bandona e torneo. Royal Power 10 careda, 12 hit, 0 error. Calabas Blue Jays 4 careda, 8 hit, 2 error.
Picther ganador un biaha mas e veterano Alvaro Barrios kende porcierto a bay cu e titulo individual di Champion Pitcher den e promer ronda cu 5 victoria y 0 derota. Jomir Vrolijk ta bay cas cu e derota riba su nomber. Mihor bateadornan pa Royal Power Tat Fat Home Depot ta Dijendrick Croes di 3-3 mas un base por bola, Kenny Hart 4-2, Franco Wouters di 4-2, Juni Faro, Giandrick Lacle y Pierre Junior Richardson tur di 2-1. Pa Calabas Blue Jays a destaca na plato den causa perdi Jair Thompson di 2-2 cu un cuadrangular den deep left, Jose Suares Gonzales 5-2, Alvaro Maduro di 2-1.
Asina Royal Power Tat Fat Home Depot a elimina Calabas Blue Jays y a pasa pa final enespera di e ganador entre Tanki Leendert Giants vs Kudawecha Indians y net na serada di nos edicion noticia a drenta cu Kudawecha Indians a elimina Tanki Leendert Giants organisadornan di e torneo y lo enfrenta Royal Power den e gran final. Durante siman lo amplia riba e wega final.
