Lisette Gomez ta traha den e area social. Durante e accion di firma e tabata presente y a duna tambe su comentarionan riba e ocasion. Mester para e cosnan aki y atende otro problemanan cu tin riba nos pais, el a enfatisa.
E ta comenta cu esaki lo afecta nos problemanan social. No a atende cu loke tin ainda y ta cuminsa cu algo nobo. E ora nos ta bay keda hopi pega cu nos problemanan social, mirando cu nan ta hopi grandi. Te cu awe tin un aña caba di parlamento y no ta mira ningun tipo di cambio y accion cu ta tuma luga na e supuesto plan social cu tin awor aki.
“Ban para esaki”, segun Gomez. Ta e ultimo beach di Palm Beach y tur hende por haci uso di e beach.
Ban para esaki y atende nos problemanan actual, entre otro cu problemanan social prome cu hinca nos den algo mas grandi manera esaki, el a splica.
Raymond Kamperveen tambe un miembro di partido RAIZ. E tabata presente durante e accion di firma. Durante entrevista el a comenta cu dimes e ta sostene e movecion. Esaki ta un comienso.
E no ta solamente algo social, sino tin cu wak e presion con esaki lo bay pone riba nos AZV y hospital cu no lo carga asina tanto hende. Falta polis y nan no lo keda cla. E sneeuwbal efect cu lo bay bin riba esaki so ta pa cuminsa, sin conta e otronan.
No a keda nada otro di para pa un moratorio. Raiz ta kere den integridad. Si e ministernan tin algo, trece tur cos na cla y bisa con cos ta.
Kamperveen tin un mensahe pa e ministernan concerni y pa gobierno. No pensa riba Raiz, pensa riba e futuro di mañan. Ora cu bin un hotel y trece 17 mil cubo di trabao. Ta duda cu nos mesun hendenan lo haya trabao. Ora un hende imigra, e mag di bin cu su famia.
E pregunta na gobierno ta, unda lo hospeda nan, ken lo hospeda nan, ken ta bay paga pa nan AZV, cual ta nos ta bay carg’e, ken ta bay paga pa scol. Nan a traha un deal pa traha un scol? Eseynan ta loke Raiz kier tende, pa tin un solucion.
E punto ta cu den bida tur cos tin un solucion, pero tin cu sinta na mesa y busca pa papia. E cos mas principal ta, claridad. Raiz kier claridad, bin cu documentonan y sinta na mesa pa soluciona tur cos.
