E crusada den e sector di Palm Beach ta un area hopi trafica tanto pa turista como local. Practicamente tur dia tin un of mas accidente.
A cera e crusada mas cu un biaha, hopi a pensa cu esaki ta pa haci adaptacionnan na dje. Pero nada no a tuma luga. Hustamente den momento cu turismo di Aruba tabata practicamente cero tabata momento pa traha y haci e adaptacionnan necesario na e sitio aki.
Luznan di trafico no ta funciona mas. E piezanan ta kibra cada bes y ta keda for di uzo hopi tempo pasobra ta tarda pa haya e piesanan.
A pesar di baricada y otro borchinan, e accidentenan ta sigui tuma luga. A papia pa hopi tempo caba pa construi un rotonde den un zona hopi uza. Esaki ta e momento pa haci e adaptacionnan necesario, treciendo cambio den structura di e crusada. Segun por a compronde, chauffeurnan ta keha cu e visibilidad no ta 100%.
Na momento cu turismo no a subi ainda na su capacidad maximo, ta husto e momento pa duna prioridad pa drecha e area aki pa crea un trafico mas sigur, pa nos bishitantenan pero tambe pa nos localnan. E pueblo ta pidi pa esaki.
