‘Stichting Monumentenzorg Curaçao’ a disidí pa introdusí e bi-anual ‘Ernest (Jackie) Voges Monument Award” pa un organisashon òf persona ku di un forma ekstraordinario tabatin su mérito pa konservá monumento na Kòrsou.
Otro aña, ora e fundashon ta selebrá su di 65 amiversario, lo otorgá e premio aki pa promé biaha. Na aprel 1954 a lanta e fundashon partikular (‘Ngo’) pa kuido di monumento; pues, otro aña e ta eksistí 65 aña. Su meta primordial ta pa konservá i drecha monumento. Pa esei e fundashon ta kumpra monumento ku ta den mal estado i ta restorá nan. Ku hür di e monumentonan restorá e fundashon despues por paga pa nan mantenshon. Ademas e fundashon ta boga pa promové apresio pa nos monumentonan, e ta duna konseho riba tereno di restorashon i maneho di monumento, i e ta stimulá investigashon sientífiko di historia di Kòrsou, mas en partikular di su monumentonan. Jackie Voges Durante 50 aña Mr. ing. Ernest ‘Jackie’ Voges tabata estrechamente envolví ku e fundashon. Na 1966 el a bira miembro di direktiva, di 1982-2003 el a fungi komo presidente, despues el a bira miembro ‘normal’ di direktiva atrob i finalmente e tabata konsehero te ougùstùs 2016.
Bou di su liderato a drecha un kantidat grandi di monumento na Kòrsou i asina a konservá nan pa komunidat. E fundashon a krese bira un organisashon profeshonal. Pa tur loke señor Voges a nifiká pa konservashon di e herensia kultural na edifisio monumental di Kòrsou, dia 27 di yanüari e aña aki Direktiva i Hunta di Komisario di Stichting Monumentenzorg Curacao a disidí pa introdusí un premio di monumento ku ta karga su nòmber, tambe komo muestra di apresio p’e i su esfuersonan. E ‘Ernest (Jackie) Voges Monument Award’ lo bai pa un persona òf organisashun ku a presta di forma ekstraordinario riba tereno di konservashon di monumento na Kòrsou. Un hurado independiente lo hasi e eskoho for di e persona i/òf organisashonnan ku ta bini na remarke pa esaki. Kada dos aña lo otorgá e premio, pa promé be den e aña di hubilo na 2019. Mas despues lo sigui duna mas dato al respekto.
