Mentira ta un pleister temporal cu hende ta uza pa tapa un herida sushi of pa sconde nan impotencia. Pasobra tur locual ta forma a base di mentira ta temporal y tur biaha e final ta trece berguensa.
Ta miho bo papia berdad for di principio cla y raspa manera e cos ta, cu bo bay gaña sabi y despues bo ta resulta bobo pasobra bo a papia mentira.
Como cabes di cas, sea tata of mama bo ta yama pa papia e berdad cu bo yiunan y alabes instrui nan den e caminda di berdad, spiritual y social.
Pasobra mentira ta pica y no tin ningun trabao caminda bo por haya trabao door di gaña, pasobra si bo sa cu e trabao ey lo pone bo gaña awor of den futuro, por fabor no tuma e trabao pasobra berguensa ta bay keda pa bo.
Tampoco bo no ta gana nada door di gaña riba hende, pa abo ta privilegia, un famia no por lanta a base di mentira, pasobra mentira no tin fundeshi. Semper e ta debilita.
E Palabra di Dios ta siña nos pa cana den e berdad, por ehempel ora nos no por alcansa algo, nos mester sinti nos mes liber pa bisa nos yiu cu pa aworaki no por y cu tene pasenshi asina e asunto ta posibel nos lo lag’e sa.
Asina ta forma di educa un mucha, pa e sa e berdad, di su mayornan y asina crea un base di confiansa, caminda ningun hende no por hinca boca, pasobra e mucha y su mayornan ta para pa e berdad.
Si bo ta hende homber y bo a para papia cu un hende muhe riba caya of den Supermarket etc., sea asina sabi y yega cas y bisa cu bo a topa cu un persona y cu bo a para papia cu ne, bo tin nada di sconde ni tampoco gaña. Un hende cu ta papia berdad no tin miedo si otro hende contesta su telefon.
Nunca no gaña pa tene un hende cerca bo pasobra ora e berdad sali na cla e persona lo bay cu su rason pasobra pa hopi tempo bo tabata gaña.
E spirito di mentira ta masha contagioso, asina cu abo como mayor habri porta pa e drenta cas, spera cu e ta contagia bo yiunan, simplemente corda cu mentira ta existi prome cu corona virus.
Mentira a kibra hopi famia y hopi organisacion. Y ta kibrando tur esunnan cu te ainda no ta realisa cu bo no por sigui gaña, pasobra awe e por sali bo di bon, pero ora bo no pensa bo ta cay.
Trata di tene mentira leu for di bo boca y for di bo hogar. Pasobra Proverbionan 6 vers 17 ta bisa cu Dios ta odia wowo orguyoso y lenga mentiroso.
Hopi hende ta papia mentira pa motibo di orguyo pasobra nan kier keda mantene un status falso y esey den bista di Dios no ta posibel, pasobra ora Dios laga bo cay pa motibo di mentira ningun hende no por sostene bo.
Un homber cu ta gaña su famia ta un homber iresponsabel, pasobra e kier duna nan un speransa cu no ta existi, e ta trece duda den cas y tambe ta trece faltamento di respet y awor mas cu nunca, violencia.
No ta existi un bida di oracion mescla cu mentira, pasobra mentira ta bin for di diabel y berdad ta bin di Dios y bo no por come for di e tayo di mentira y esun di berdad na mesun momento.
Sea consciente como mayor. Evita tur tipo di mentira y falsedad, lanta bo famia cu berdad, pasobra berdad ta trece bendicion. E ta halsa bo nivel di bida, e ta haci bo famia integro y porta ta habri tur momento pa hende cu ta papia berdad. Por fabor laga bo yiunan sa esey, y educa nan den e Berdad.
