Diasabra marduga, den careda di 1:50 am a sosode un accidente cu basta daño material na Camacuri, na altura di Do it Center. Chauffeur di un Kia Seltos colo blanco, numera A-77880, a perde control y a baha caminda, bay dal den un palo di luz, cu e consecuencia cu e auto a resulta total loss.
Porta di e auto parti patras a ranca por completo y den e proceso, e taira di auto a laga los. E chauffeur tabata keha di dolor na su curpa. Ambulance a presenta p’asina duna atencion medico necesario.
E palo di luz keda dobla y personal di Elmar mester a presenta pa kita e dos luznan cu tabata colgando den un forma peligroso, pa despues pone un palo di luz nobo y pone bek den funcion.
Polis di trafico a presenta na sitio mirando cu e ta un agente policial cu auto di trabou ta accidenta y tambe a pone supla pa wak si eta bou influencia di alcohol.
Polis a cera ambos banda di caminda p’asina nan por evita pa trafico por a pasa.
Mientrastanto a hiba e chauffeur hospital. Daño material ta considerabel.
