Cinco Bombero a haci tur nan esfuerso y a logra rescata un pushi chikito cu a bay pega den motor di un auto.
Den oranan laat di atardi un chauffeur coriendo riba Schotlandstraat a sinti un zonido straño den motor di su auto Nissan March. Mesora el a dicidi di para e auto y hala un banda pa wak kico tabata pasando. A bin constata cu di un forma of otro, un pushi a logra drenta den motor di auto. Esaki a duna e chauffeur un susto grandi.
A bati alarma na Cuerpo di Bombero cu a manda diferente Bombero na e sitio.
Pushinan den situacion asina ta bira shimaron, haya miedo y ta haci dificil pa logra yega na unda cu e ta. Dos di e Bomberonan a bay bou di e auto. Un di nan a ilumina e parti abou, mientras cu e otro Bombero a logra a saca e pushi.
Tabata trata di un pushi hopi chikito, cu tabata tembla di miedo cu e tabatin.
