Te cu 12:00 pm a tuma e luga e colecta nacional organisa pa Koningin Wilhelminafonds (KWF). E actividad aki, anuncia p’e plataforma di 24ora.com, a cuminsa trempan mainta, permitiendo tur residente di Aruba pa participa y contribui n’e diferente rotondenan di e isla.
Uni pa un causa comun
Joselyn Koolman di KWF, a comparti detaye riba e colecta nacional. El a menciona e colecta aki a tuma luga cu colaboracion cu varios grupo di biker. Jossy a comenta riba e progreso di e evento.
Progreso di e colecta
“E colecta ta bayendo hopi bon,” el a menciona. Nan a sali cu un grupo grandi di boluntario, cuminsando oficialmente cu e bandera di KWF. Nan t’ey presente na tur e rotondenan importante di e isla: FTA, Pos Chikito, Santa Cruz, Bright Bakery, na Imelda Kleuterschool, Tanki Flip, riba Renaissance y tambe n’e rotonde di Santa Helena. En total nan a cubri nuebe rotonde.
E bikernan a uni den gran cantidad y ta spera cu henter e comunidad acerca n’e rotondenan mas cercano pa contribui cu nan granito de arena.
Participacion y boluntario
E actividad no ta tuma luga tur fin di siman. E aña aki, el a tuma luga riba dos fecha specifico, dia 4 di mei y diasabra, dia 25 di mei, Joselyn a splica.
Dia 4 di mei un otro grupo di boluntario a atende cu esey y e bikernan a participa diasabra mainta. Fuera di esey nan tin otro dos rotonde cubri pa otro organisacion cu kier a join y KWF a acepta nan ayudo cu gusto, Joselyn a splica.
Importancia di contribui
Ta crucial p’e comunidad participa y haci su donacion. Cada contribucion chikito ta conta y hopi famia na Aruba ta enfrentando e enfermedad grave aki, Joselyn ta añadi.
Cada sosten ta yuda. Hopi famia ta lidiando cu cancer. Durante e colecta por a mira e boluntarionan cu varios colo di bandana, cu ta representa cada famia cu un pashent cu un tipo diferente di cancer.
Detaye di e evento y otro actividad
E actividad aki a dura te cu 12’or di merdia. Despues, lo realisa un ride for di San Nicolas, pasando na tur e rotondenan y lo finalisa riba e parkeerplaats di KWF na Alameda (Playa), caminda cu lo tin coy come y bebe pa tur e bikernan. E boluntarionan tambe lo t’ey presente p’asina conta cua rotonde a colecta mas fondo.
E necesidad den comunidad di Aruba ta grandi, tanto p’esunnan afecta p’e malesa como pa su famia. Ta invita tur hende, cada aporte chikito ta yuda, asina ta uni un biaha mas. E bikernan di Aruba ya a responde, awo pueblo di Aruba, uni n’e causa aki tambe.
