Diahuebs ultimo, durante un evento cu a marca un paso importante relaciona cu comercio exterior di Aruba, e comerciantenan local a congrega na Departamento di Asuntonan Economico na Sun Plaza pa haya sa mas riba e proximo Trade Mission cu lo tuma luga den luna di juni.
Sharon Meijer-van der Linden, cu ta encabesa e departamento di relacion economico exterior y business development na Departamento di Asuntonan Economico y Industria, a splica cu e sesion informativo aki ta diseña pa prepara e empresarionan local pa un Mision Comercial na Surinam. El a revela cu tabatin un entusiasmo palmpabel entre e 56 empresario y comerciante Arubiano presente.
“E proposito di e reunion aki ta pa ekipa nos empresrionan cu e informacion y e hermentnan necesario pa probecha lo maximo e siguiente Mision Comercial na Surinam,” Meijer-van der Linden a declara. For di logistica di exportacion te na e detayenan riba estadia y e costonan, e participantenan tabatin e oportunidad di ricibi orientacion specifico y haci pregunta directo relaciona cu nan interesnan comercial den e pais Sur Americano aki.
Durante e intercambio, a surgi diferente consulta riba e fechanan di biahe, oportunidad di B2B networking y e potencial di participacion futuro. Meijer-van der Linden a destaca cu esunnan cu no por a asisti n’e evento, ainda tin e oportunidad di join n’e Mision Comercial, enfatisando e importancia di explora oportunidad nobo di haci negoshi den un mercado den crecemento.
E mision Comercial, programa di dia 24 pa 28 di juni, ta priminti tres dia intensivo di actividad, diseña pa conecta e empresarionan Arubiano cu socio comercial clave na Surinam. E sectornan manera agricultura y construccion ta particularmente na bista, ofreciendo e empresarionan e oportunidad di expande nan horizonte y establece relacion comercial solido den e region.
“E evento aki ta mas cu un simpel Mision Comercial, e ta un oportunidad pa fortalece e lasonan comercial entre Aruba y Surinam y fomenta un crecemento economico mutuo,” Meijer-van der Linden a expresa. Fuera di esey, el a destaca cu e pakete completo di e Mision Comercial ta inclui alohamento, transporte y cuminda, haciendo cu e participacion ta accesibel y conveniente pa tur e interesadonan.
Pa haya mas informacion riba e Mision Comercial na Surinam, e empresarionan por comunica cu e Departamento di Asuntonan Economico of Camara di Comercio, caminda cu nan lo ricibi orientacion detaya riba con pa participa y e beneficionan potencial cu e evento aki por trece p’e crecemento comercial di Aruba.
