Como un Laureat di Zilveren Anjer y abona na e noticiero di Cultuurfonds, siman pasa mi a ricibi varios informacion cu mi kier comparti tocante cambionan den otorgamento di e Zilveren Anjer.
Pa cuminsa, e nomber original di e comision a cuminsa cu Prins Bernhard Cultuurfonds. Prins Bernhard tabata otorga e Zilveren Anjer for di aña 1950 cu el a cuminsa. Despues cu e Prins a fayece na 2004, su yiu muhe, Prinses Beatrix a tuma over y a haci esaki te cu aña pasa, pasobra e aña’ki e lo no ta presente den Palacio di Amsterdam pa e otorgamento. Motibo pa cual nan a scoge e Kasteel Amerongen na Utrecht pa e promixo otorgamento dia 3 di juni.
Mi ta compronde cu e kasteel aki tin un hardin masha grandi y bunita. Su storia ta data desde 1862 y cu varios reconstruccion/renobacion despues.
E nomber di Zilveren Anjer tambe a cambia y awo e yama Cultuurfonds Onderscheiding. Tambe awo padilanti, e otorgamento pa nos islanan, e Minister Plenipotenciario lo bay otorga e Cultuurfonds Onderscheiding aki di cada isla envolvi y e luga lo wordo scogi cada biaha.
Dos aña pasa cu mi a ricibi e honor aki, mi tabata e ultimo na Aruba y den Caribe cu a ricibi e Zilveren Anjer for di man di Prinses Beatrix y mi ta sinti mi hopi honra. Manera nos tur sa, Prinses Beatrix ta un ex-Reina cu semper a stima nos islanan. Ainda mi tin e bunita recuerdo di nos combersacionnan na dos ocasion.
Pa aña nan ta otorga tres pa cinco persona cu boluntariamente a contribui engrande den cultura, etc. di nan pais, sin cobra un cen, por lo menos dies aña. Si tin un pareha, e ta conta pa uno, aunke tur dos ta ricibi e honor, door di ta traha hunto den nan proyecto.
E personanan cu lo bay ricibi e Cultuurfonds Onderscheiding dia 3 di juni proximo na Kasteel Amerongen ta:
1. Rose Mary Allen – voor haar inzet voor cultuureel erfgoed en geschiedenis van Curacao.
2. Franke Remerie – voor zijn inzet voor natuurbehoud en biodiversiteit
3. Patrica Tjiook-Liem – voor haar inzet voor het culutureel erfgoed van Chinese Indonesiers in Nederland.
4. Gert-Jan en Carla Kramer-Lems – voor hun inzet vor muziek, beeldende kunst, erfgoed en theater.
5. Engelen van Amerongen – voor hun inzet voor het behoud van historisch textiel.
For di aki, mi ta manda un pabien grandi pa nos ruman na Corsou, Rose Mary Allen cu lo ta e unico den Caribe cu lo ricibi e Cultuurfonds Onderscheiding e aña aki. Pabien Corsou. Mi ta sigur, bon mereci. (Mi tin su potret, pero mi no tin su permiso pa public’e.)
Dufi Kock, Escritor y Historiado y ganado di Zilveren Anjer 2022
