Den un ceremonia emocional, a honra e dinamico presidente di Centro di Bario Playa Pabao, Dennis Burke. E evento aki tabata un momento di gran alegria, caminda cu a dicidi di reconoce e labor di e figura destaca aki.
Jossette (Jossie) Maduro, Assistant Coach di Bushiri Boys, a comparti su perspectiva riba e iniciativa, unda cu el a indica cu nan tin e ekipo, di cual hopi hende sa, no tin un bon nomber pero si hopi talento. A dicidi di forma un ekipo y a participa den un torneo di futbol di sala, caminda cu nan a coy campeon y Dennis tabata un gran siguido durante henter e campeonato. Nan a pensa e ora riba e idea pakico no homenahea un hende cu ta na bida y cu ta haciendo hopi pa e bario di Madiki.
El a profundisa riba e contribucion di Dennis Burke n’e ekipo y na comunidad. Jossie a indica cu Burke tabata un di nan fanaticonan durante henter e campeonato. El a duna sosten n’e muchanan for di un principio te na final y esey ta algo cu nan ta aprecia hopi di dje.
Aki tambe a destaca e percepcion comunitario di e compromiso di Dennis cu e Centro di Bario y su impacto positivo den proyecto local.
Na momento di a acerca Dennis Burke, sigur un presona ocupa cu e Centro di Bario, e no a duda pa duna sosten n’e iniciativa aki, mirando cu Bushiri ta net dos stap leu di e Centro y reconociendo esaki como un proyecto hopi positivo, Jossie a remarca.
Den un momento conmovedor, Dennis Burke di su banda a expresa su gratitud p’e reconocemento: “Mi kier a gradici Pa Jo Jossie p’e honor aki. Manera boso sa, ora cu bo ta haci trabao boluntario, bo no ta hacie p’e reconocemento. Ora cu ta yega e momento, e ta bira hopi emocionante. Pami ta un honor acepta e reconocemento aki.”
E evento tambe a resalta e compromiso di Dennis cu e ekipo hubenil, su dedicacion cu a contribui n’e exito di e ekipo den e campeonato.
“Si e ekipo no a gana, e lo tabata un gran decepcion pa Pa Jo. Pero Pa Jo tabatin fe. E tabatin fe y tambe a dirigi e ekipo p’e victoria durante e torneo di futbol di sala,” Dennis a comparti.
Den su reflexionnan riba e trabao comunitario, Dennis a destaca e importancia di ilumina e direccion pa hubentud.
“Un bario sin luz ta universidad pa criminalidad,” el a bisa. Semper Dennis a preocupa pa e muchanan. Pero , kico haci? E nomber cu Bushiri tin e no merece, ta loke el a expresa. Pakico? Pasobra nan ta creciendo den un bario sin luz. Prome, tempo cu e tabata reparti flyer anochi, e tabata mira e muchanan sinta y tabata puntra su mes kico nan ta haciendo. P’esey e dicho di Burke: “Un bario sin luz ta universidad pa criminalidad.”
E homenahe na Dennis Burke ta destaca no solamente su compromiso cu e ekipo di Bushiri Boys, sino tambe su labor incansabel den comunidad pa construi un futuro miho p’e hobennan. Su ehempel ta inspira pa sigui traha n’e bienestar pa tur den e comunidad.
