Minister di Asuntonan Economico Geoffrey Wever no ta preocupa pa e parti di inversion, pasobra gobierno ta y lo sigui inverti tur aña. Esaki ta visibel riba tur presupuesto.
Minister Wever a splica cu tin un palabracion cu ora tin un surplus tambe, por uza 25 miyon florin pa inverti.
Ya caba den aña 2023 tabatin “meevallers” cual a yuda gobierno pa haci inversionnan adicional den aña 2024, manera den enseñansa..
E mandatario ta kere cu traha (goberna) den constelacion manera e landspakket, ta algo hopi positivo. E mes ta traha den constelacion di esaki cu cierto proyecto y e comentario cu e tin ta positivo so e ta. P’esey e ta bisa cu di awo en adelanta, lo tin hopi mas oportunidad cu Landspakket y fondonan cu Hulanda ta pone disponibel pa inversion. “Hulanda tin fondonan cu a pone recientemente disponibel pa Aruba, entre otro pa acelera e transicion pa un otro tipo di energia.” Y a agrega cu recientemente el a sinta na mesa cu expertonan di Hulanda, hunto cu su colega Glenbert Croes. Pero tambe pa papia riba otro proyectonan cu tin impacto duradero riba economia di Aruba, lo por bini na remarca pa fondonan di Hulanda.
E mandatario a bisa cu Aruba simplemente mester percura cu su plannan ta bon hinca den otro pa tin acceso na fondonan di Hulanda. Un ehempel ta e 13 miyon euro cu a ricibi recientemente for di fondonan Europeo pa e-government cu tabatin hopi aña den preparacion y a logra haya e subsidio pidi. Maria Convent, un facultad di Universidad di Aruba, ta un bibo ehempel di esaki. E preparacion di esaki a inicia for di aña 2016, pues carga door di diferente gobierno. Y el a bira realidad cu fondonan Europeo. “Si nos no tabatin e vision pa bin cu un facultad manera esun di SYSTEMS, nos nunca lo a haya e fondonan ey.”
Minister Wever ta kere cu Aruba ta capaz pa traha bon proyecto. Aruba a demostra di tin un bon relacion cu Union Europeo y tin dos proyecto cu ta prueba di esey. Y awo tin combersacionnan interesante tumando luga cu Hulanda pa financiamento di proyectonan cu ta na beneficio di e economia den su totalidad. Y, no ta papia djis un edificio. Economia ta algo hopi mas amplio, segun e mandatario. “Cualkier gobierno cu bin despues por sigui cu e tipo di e proyectonan aki cu lo tin bon impacto pa Aruba.”
