Den fin di siman a tuma luga un convencion virtual den cual miembronan di e club di Kiwanis a topa cu otro pa un convencion. Ta trata aki di e “Kickstart Convention” organisa pa Kiwanis Division 26 – EC&C District. Particular na e convencion aki tabata cu a invitado di honor tabata ex-minister di Aruba, Michelle Hooyboer-Winklaar. Su presentacion no tabata di politica, sino di liderazgo, tema cu e ta domina bon y a sigui studia pa profesionalisa su mes miho ainda den dje durante e ultimo añanan. Awendia e ta un orador invita na varios di e tipo di eventonan asina internacionalmente, den cual su experiencia di minister na Aruba como ocho aña tambe ta resalta.
Kiwanis Division 26 ta un division di Kiwanis cu ta consisti di 14 club den 5 diferente pais, cual ta Aruba (4), hermana isla Corsou (2). Boneiro (1), Surnam (2) y Trinidad & Tobago (4). Cada club ta consisti di lidernan den area di educacion, negociacion, comunidad, profesional y civico. Nan ta reuni regularmente pa educa, inspira, planea y implementa proyectonan cu ta yuda improvisa nos comunidad, enfocando riba mucha- y hobennan, nos grandinan y tambe e grupo minoria den comunidad.
Riba e di dos dia di e evento aki, cu a tuma luga dia 15 di mei, ex-minister di enseñansa, Michelle Hooyboer-Winklaar a presenta como e orado principal. Winklaar a duna un discurso riba e tema di liderazgo y a cubri e 5 practica di liderazgo ehemplar cu e siguiente topico nan:
- Model the way.
- Inspire a shared vision.
- Challenge the process.
- Enable others to act.
- Encourage the heart.
E club a gradici Michelle Hooyboer-Winklaar pa e tremendo discurso y ta spera di por conta cu ne den futuro atrobe.
Ken ta Michelle Hooyboer-Winklaar
Michelle Janice Hooyboer-Winklaar ta naci dia 20 september 1969 na Toronto, a crece y studia na Canada unda el a traha na Bell y tambe na AT&T, ambos companianan di telecomunicacion. Na aña 2005 el a bira general manager di Digicel Aruba. Proximamente a subi lista di AVP y asina a forma parti di Gabinete Mike Eman I como Minister di Asunto Economico y Cultura di 2009 pa 2013. Despues a forma parti tambe di Gabinete Mike Eman II como Minister di Enseñansa di 2013 pa 2017. Na aña 2017 Hooyboer a regresa Canada pa sigui studia den ramo di liderazgo y coaching.
Awendia Michelle Hooyboer ta residencia na Canada y tin e posicion di Senior Associate na e compania Cadence Leadership+Communication. Den su trayectoria e tin mas di 25 aña di experiencia di liderazgo internacional y tambe Canades.
Michelle Hooyboer-Winklaar ta casa di Detlef Hooyboer y tin dos yiu.
Tocante Kiwanis Club of Palm Beach Aruba
A funda Kiwanis Club of Palm Beach Aruba na aña 1984 cu solamente 26 miembro. E club a crece te cu awendia ta conta cu mas of menos 60 miembro. Richard Roy ta presidente di e club, Onasito Thiel ta secretario, Carlos Tapias ta tesorero, Ivan NG ta presidente saliente, Daniel Aguirre ta vice-presidente, Rothmar Coenraad ta presidente eligi, mientras cu e demas miembronan di directiva ta Joreme Barendregt, Mike Bareño, Misha Bemer, Evan Giel, Roy Mezas, Bert van der Horst y Jan Welage.
