E mundo ta birando dia pa dia mas duro. Hende ta cera curazon pa otro. Esun cu ta come, no ta corda riba esun cu no por come. Nos ta simplemente bisa algo y esey mester sosode y esey ta tur cos.
Pero Dios si tin misericordia, pa nos tur. Y ora bo tin misericordia cu hende, Dios lo tin misericordia cu bo, pasobra su palabra ta bisa cu misericordia lo ta duna na esun cu tin misericordia.
Misericordia ta un palabra bieu cu e generacion nobo aki no ta use mucho, ni tampoco ta menciona e palabra compassion. Pero ta pa medio di misericordia y compassion di Dios cu hende ta bendiciona.
E ciego Bartimeo a grita: “Hesus, yiu di David, tene misericordia di mi. Esey ta nifica: Tene compassion y laga Bo Gracia favorece mi.”
Misericordia ta bin fo’i trono di Dios. Y E ta pone riba curazon di esunnan cu ta dispuesto pa aplic’e den bida di otro.
Pasobra duresa di curazon ta na moda, curazon di hero y di piedra ta manda den hogar caminda aunke nos ta mira cu ta perhudica e yiunan, toch nos ta sigui cu dureza di curazon.
Hopi biaha nos ta mira comportacion di mayor y nos ta puntra nos mes. E persona aki no tin misericordia. E no ta sinti cu e ta haci su famia daño y no ta mira cu su yiunan ta bay perdi, ta lubida e a lubida su responsabilidad.
Bijbel ta bisa cu den ultimo tempo e amor di hopi lo fria. Hende ta biba sin ningun clase di compromiso cu Dios. Nan mes ta kita. Nan mes ta pone. Nan mes ta stroba y nan mes ta dicta, sin ningun clase di misericordia, sin temor di Dios.
Dios no kier pa nos biba asina cu otro. Dios a bisa stima bo prohimo manera bo mes y practica misericordia riba tur cos.
Hebreunan capitulo 4:16 ta bisa: “P’esey laga nos acerca e trono di gracia cu confiansa pa nos ricibi misericordia y haya gracia pa yuda den tempo di necesidad.”
Santiago capitulo 4:13 ta bisa: “Pasobra huicio lo ta sin misericordia, p’esun cu no a mustra misericordia. Misericordia a triunfa riba huicio.”
Ta solamente e misericordia di Dios por guia nos den un mundo cruel y duro y solamente e misericordia di Dios por duna nos e victoria.
Cada biaha cu abo como mayor ta guia bo yiunan den e caminda di Dios. Bo ta guia nan na misericordia. Bo no ta laga nan pa nan cuenta, pero bo ta mustra nan cu tin speransa den Cristo Hesus.
Proverbio capitulo 3: 3 y 4 ta bisa: “No laga nunca misericordia y bondad bandona bo. Mara nan rond di bo garganta, skirbi nan riba tabla di bo curazon.”
Asina lo bo haya y aprobacion den bista di Dios y hende.
Laga cada hogar ta yena cu misericordia y bondad. Pasobra esey ta activa e presencia di Dios.
