Consulado di Filipina tin un evento pa registracion di votado y tambe servicio consular pa e comunidad Filipino. No solamente p’e Filipinonan na Aruba, sino tambe pa esunnan di Corsou y di Sint Maarten. E evento a cuminsa fo’i diabierna caba y lo dura te cu dialuna 11 di october na Club Don Bosco.
Segun Consul general honorario di Filipina, Amy Henriquez-Mendez, e ciudadano Filipino por bin pa asina haya un recepcion di su paspoort y tambe registra pa e eleccion otro aña na mei 2022.
Despues di e evento, e team di e embahada di Filipina na Den Haag lo reporta kico tur a sosode durante e dia aki.
E team ta encabesa pa Marianne Bringas, secretario y vice-consul di e embahada di Filipina na Den Haag, kende ta na Aruba, a splica cu e Filipinonan na Aruba tabata warda pa e momento aki pa dos aña.
Bringas a menciona cu aña pasa nan no por a bin pa motibo di e pandemia, pero finalmente nan ta na Aruba.
Manera ya indica, nan bin pa renobacion di paspoort y tambe pa registro di votado, proceso cu ta dura 6 pa 8 siman y despues e Filipinonan por haya nan paspoort nobo.
Pa loke ta Hulanda, nan tin un sistema di post. Nan lo post e stembiljet pa e votadonan registra, cu di nan turno lo post esaki bek pa e embahada.
Tin Filipino tur caminda y ta forma un comunidad, papiando nan propio idioma Filipino y pa nan ta hunto. Tin cu remarca cu e nostalgia di cas sa t’ey de bes en cuando. Bringas ta menciona cu nan ta contento cu e Filipinonan a responde y a bin na e evento pa asina haya e servicio di e entidad y ta spera por yuda den loke nan tin mester.
Bringas a menciona di ta spera cu e evento aki sigui tur aña, depende di e circunstancianan y ta purba di t’ey mas hopi posibel
