Awe djamars 26 di yanüari mainta, direktiva di PAR, a wòrdu notifiká dor di diferente miembro preokupá pa e echo ku nan a señalá destrukshon na materialnan di kampaña di nos partido na diferente kaminda na Kòrsou.
Direktiva tambe ta ta sumamente preokupá ku e akto aki. E echonan aki a ta buta direktiva di PAR saka e komunikado aki pa diferente motibu. Nos ke pa esnan ku a hasi nan mes kulpabel na e echo aki pensa riba un par di aspekto. Si akaso tin hende ta instigá bo persona pa kometé e tipo di aktonan, aki realisá bo mes ku den futuro ta e hendenan aki lo ke bai goberná nos pais. Awe a destruí propiedat di partido PAR, mañan e por ta bo kas, bo outo, skol di bo yu i/òf propiedat di e mesun gobièrnu ku nan ke bai liberá.
Elekshon semper ta wòrdu gana dor di hiba debatenan sano a base di puntonan di salida polítiko. E aktonan aki ta muestra di e karakter di sierto partidonan ku ke bai elekshon i ke bai goberná e pais aki den futuro. E tipo di aktonan aki ta demostrá pueblo di Kòrsou, bon kla, ki ehèmpel nan ke manda pa abo komo siudadano si nan no ta di akuerdo ku bo komo hende. E aktonan aki ta pusha nos komunidat den kriminalidat.
Ta asina aki ke eduká nos yu- i hóbennan pa atendé ku otro den futuro? Partido PAR ta boga i bringa pa formashon di nos hubentut i otronan ta hasi lo kontrario. Ta p’esei dia 19 di mart próksimo nos ta pidi bo pa hasi e eskoho korekto, pa bo yunan i pa bo mes!
