Dicon bo yiu di rond di 10 aña no kier pa bo mustr’e afeccion den publico?
Fo’i baby bo tabata mustra bo yiu cariño: bo tabata carici’e hopi. Awor cu e ta yegando 10 aña e no kier pa bo sunchi of bras’e den publico. Y especialmente no dilanti di su amigonan! Dilanti su amigonan bo sunchi, brasa y otro expresion di afeccion no ta bonbini mas.
Kisas bo ta puntrando bo mes si bo a haci algo robes cu ta pon’e reacciona asina. Esaki ta un pregunta normal cu mayornan sa haci nan mes. Aunke bo ta sinti bo fastioso cu bo yiu ta rechasa bo cariño toch bo mester respeta su sintimentonan. En realidad su actitud ta un paso normal y sano den bida di mucha den pre-adolesencia. Dilanti di su amigonan e no kier parce un mucha proteha ni tampoco un baby.
No tum’e personal.
Mientras e ta birando grandi e mucha lo enfoca menos riba complace su mayornan y lo concentra mas riba cosnan cu su amigonan ta haci pa haya nan aprobacion.
Ora un mucha yega 7 pa 8 aña e ta cuminsa desaroya un identidad los for di su mayornan y ta mira su mes atraves di otro mucha. Mayoria mucha por cuminsa rechasa muestra di afeccion di nan mayornan ora nan ta entre 8 pa 10 aña. E ora cu e yega un edad di 13 aña e ta forma un parti normal di nan comportacion.
Mustra cariño na otro forma.
Durante e tempo di cambio e mayor mester trata pa controla su gana di caricia su yiu ora cu e (mayor) kier. Esaki por ta dificil pa mayornan cu ta gusta mustra nan afeccion.
Por ta pa e mama ta mas dificil pa wanta su mes dor cu e ta hopi mas inclina pa brasa e yiu. E tata por ta tin menos problema dor cu hopi biaha comunidad ta spera di hombernan cu nan ta tof. Tambe e por compronde cu afeccion den publico por pone su yiu sinti fastioso, especialmente e yiu homber. Tin hopi tata ta mustra cariño den publico pa nan yiu muher mas largo cu pa nan yiu homber.
Kisas esaki ta pasobra nan no ta sinti nan mes mucho comfortabel pa mustra nan yiu homber afeccion publicamente. For di sociedad mucha homber ta haña e mensahe cu hombresa ta ora bo ta independiente y como tal hopi biaha e mucha homber ta rechasa afeccion publico mas prome cu mucha muher.
E rechaso ta bin na diferente manera. Por ehempel: bo yiu ta kita bo man for di su schouder, ora di bai den caya grandi e ta insisti pa bo cana 1 meter su tras of su dilanti, e ta paralisa ora e wak bo yega ora e ta cu su amigonan, etc. Pero…aunke con hopi bo yiu kier aparenta cu e ta los di bo toch e tin hopi necesidad di bo cariño. Den priva e ta acepta bo brasa y sunchi.
E siguiente sugerencianan por yuda bo mustra bo yiu cariño den publico sin cu bo ta pone bo yiu sinti fastioso.
- Fiha algun regla.
Papia den priva cu bo yiu tocante e gesto y palabra di cariño cu p’e ta “great”
y ki conducta ta aceptabel p’e. Bo por cuminsa e combersacion dor di bisa
p.e: “Ta parce cu bo no kier pa mi brasa bo mas den publico. Kico bo ta pensa
si mi duna bo un schouderklopje? Esey ta o.k?” E meta ta pa logra un forma
cu tanto pa bo yiu y abo ta algo comfortabel. P.e. e señal di duim pariba of
“high five”.
No yama bo yiu na nomber di cariño di tempo e tabata chikito, pero palabra
cu ne con e kier pa bo yam’e.
- Purba haña momentonan hunto pa mustra bo cariño.
Maske cuanto un mucha rechasa cariño den publico toch e tin necesidad di e presencia di su mayornan. Bai wak bo yiu ora e ta hunga softball, duna un presentacion di baile, canto etc. Esaki ta suficiente pa mustra cu bo tey y cu bo ta disponibel si e tin mester di bo. Laga mensahenan di cariño riba su spiel of mand’e un mensahe via cellular di bes en cuando.
Aunke bo yiu no kier pa bo bras’e henter ora toch e ta aprecia e tempo cu boso ta pasa hunto y cosnan cu boso ta haci hunto. E sa cu e ta importante pa bo ora cu boso ta papia di cosnan cu ta preocup’e. E relacion cu bo yiu ta o.k. si en general e ta bira contento ora e wak bo, ta papia cu bo den compania y ta gusta haci cosnan hunto cu bo.
- Respeta su deseo, hasta ora esaki ta varia.
Por ta tin dia bo yiu ta pusha bo un banda y otro dia e kier
ta hunto cu bo. No preocupa bo, pero sigi’e. Lag’e haci e prome paso.
Den e periodo di pre-teen bo yiu lo sigi insisti pa ta mas independiente posibel di bo. Un tendencia cu lo sigi bira fuerte te ora e yega mas o menos 18 aña. P’e tempo ey e lo sinti su mes mas sigur di e persona cu e ta. Mientras tanto bo mester tene pasenshi y tolera su actitud ambivalente.
Corda: bo yiu no ta kibrando e relacion cu e tin cu bo, sino e ta bezig ta rek’e!
Fuente: articulo “Don’t kiss me in public!” – revista Parents
Pa nos booklet “Mucha den fase di cambio (10 pa 12 aña)” y pa cualkier pregunta of comentario por aserca Fundacion Pa Nos Muchanan na Cumana 2, telefon 583-4247/588-0856, website: www.fpnm.aw; e-mail: [email protected].
