Noord Taekwondo Center a expande su orario pa asina duna mas mucha e oportunidad pa drenta Noord Taekwondo Center.
Noord Taekwondo Center ta train Taekwondo na Scol Primario Kudawecha ariba Dialuna, Diaranson y Diabierna for di 6’or di atardi pa 7’or di anochi.
Noord Taekwondo Center ta conoci pa ta e imperium di crea atletanan manera Monica Pimentel. Grand Master Chaco Cornelio y Monica Pimentel a participa den Olimpiada y a saca cara di Aruba y su Bandera. Grand Master Chaco Cornelio ta Hall of Famer, Ridder van Oranje Nassau y tin masha hopi otro premionan internacional.
Noord Taekwondo Center ta conta cu varios instructor cu experencia y cu hopi dedicacion na tur mucha. Master Melvin Rasmijn, Master Yoshmar Wever, Master David Dubero hunto cu nan comision di mayornan semper tey na tur training pa asina sostene e team di Noord Taekwondo Center.Señora Karina Barry-Martinus maestra di scol semper tey pa observa tur training di cerca y ta brinda tur su apoyo na e team di instructornan.
Tur esaki ta haci Noord Taekwondo Center e centro pa guia mucha for di 3 aña bay ariba. Si bo ta kere cu Taekwondo ta algo pa bo yiu of yiunan, semper por pasa cerca nos na Scol Primario Kudawecha pa mira e lesnan di Taekwondo y pa mira e instructornan cu ta guia cada atleta cu amor. Den e compilacion di e potretnan por mira Master Melvin Rasmijn cu hopi dedicacion ta splica faceta di Taekwondo na tur e muchanan.
