Cuerpo Policial Aruba a tuma e decision drastico awe pa suspende no menos cu tres Polis pareu. Den e comunicacion interno no a menciona motibo di e suspension, pero den pasiyonan ta bisando cu nan lo ta “lek noticia na prensa” sin specifica cua medio lo ta beneficia cu noticia. Ta trata di un “Chef van Dienst” na Santa Cruz, Sub Inspector Gabriel Thiel, Polis Forensico Luz-Maria Ruiz y Polis na San Nicolas Indira Jansen.
Cu e suspension aki, e trio no mag traha por lo pronto, mester entrega nan arma reglamentario y no por yega ningun Warda di Polis ni haci uzo di ningun material policial pa un temporada maximo di 6 siman. Den caso cu e investigacion interno contra nan no keda cla, Mando Policial semper por prolonga e periodo cu un otro 6 siman mas.
Mester menciona cu ultimo tempo a suspende varios Polis pa investigacion interno, entre otro e duo den ”Patruya 37” cu tabatin combersacion cu dos hende muhe durante nan patruya. Por lo menos un di nan a hiba Mando Policial dilanti Corte, argumentando na Hues cu no tin motibo pa su suspension y cu e no a falta na cumplimento cu su trabou.
Den e caso specifico aki di e trio suspendi awe, si acaso ta relaciona cu suministro di noticia di forma ilegal na prensa, e lo bira e di 5 Polis suspendi pa e mesun tipo di acusacion. Aña pasa tabatin caso contra dos Polis, uno ta den Corte di apelacion y esun otro, recientemente a haya condena. Den ambos caso hues a haya castigo pa haci trabou comunitario suficiente.
Cuerpo Policial ta investigando cu alma y cuerpo unda informacion ta “lek” pa prensa y den e proceso ta persiguiendo su mesun Polisnan. Mando Policial ta boga pa integridad y transparencia. Den e proceso pa logra esaki, ta suspendiendo y cerando varios Polis tras di otro, creando mas percepcion ainda cu Polisnan no ta integro.
Ban mira unda tur e investigacionnan aki lo yega na final. Den e prome caso e no a produci ningun condena di prizon, sino trabou pa comunidad. Mayoria si no ta tur e acusadonan a apela e sentencia, den cuadro pa demostra na tres Hues cu no por stroba trabou di prensa den busca informacion. Awo si Polisnan ta haya falta di radio di nan mes….ta Prensa nan mester investiga of nan mes?
