Lider di partido y di fraccion di ACCION21 ta un persona directo, no ta sconde su opinion of pensamento. Y esaki tabata e caso tambe na final di e reunion di parlamento riba e proyecto di ley pa matrimonio di mesun sexo. “AVP cu MEP ta coopera den maldad cu otro,” ta loke cu Miguel Mansur a bisa na final di un declaracion.
Na final di e reunion di diaranson anochi, 20 di e 21 miembronan di parlamento a vota. E votacion a sali 10-10. Tur cos a keda pega y esaki, Mansur ta bisa, no mester a sosode asina. “Di cuminsamento mi a bisa cu e echo di no a trece e asunto aki na un votacion ta un cobardia. E reunion mester a tuma luga aña pasa caba. Esey no a sosode debi na cobardia di partido MEP.”
Di loke nan tabatin conocemento, e ley lo mester a pasa sin problema. Pero a constata cu Arthur Dowers a cambia su posicion y e ta mesun politica sushi di MEP y AVP. Awe, e ta bisa, AVP a eherce e mesun cobardia cu partido MEP. El a señala cu e partido berde na aña 2021 a hiba un campaña cu nan ta na fabor di igualdad matrimonial y diaranson nan a insisti riba su mes, hunto cu Dowers, cu e ley no por pasa. E fraccion di AVP tabatin 3 vota na fabor y 2 en contra. “Mi ta kere cu campaña cu un tema y despues traiciona bo votadonan den un reunion ta un lastima.”
Si mira futuro di e pais y futuro eleccion, diaranson e politiconan den parlamento tabatin e oportunidad pa haci Aruba uno mas igual, cu menos intolerancia y discriminacion, pero AVP y MEP no tabatin e curashi p’esey sosode. “Mi ta kere cu esey lo keda refleha bek den resultado di e proximo eleccion. Ami personalmente no por sostene un hende cu no ta para pa Constitucion pa e bay ocupa e puesto di Minister di Husticia. Si nos bay den un gobernacion, parlamentario Dowers ta un hende cu mi no por apoya pa e puesto di Minister di Husticia.”
E ta sinti tambe cu diaranson tabatin intento pa konkelmento ora cu a trata di cambia e sistema di votacion di ultimo 37 aña pa e ley no a pasa. “Ta straña mi cu nan no a kima e edificio pa e reunion no tuma luga. Nos ta kere cu ainda nos pais ta domina pa politica sushi, y Constitucion di Aruba no ta conta.”
Na final e tabatin un mensahe pa e comunidad di LGBT, cu e ta bisa ta e uniconan afecta pa e ley. “Boso ta balora y stima. No laga e votacion, cu ta un muestra di cobardia di MEP y AVP, afecta boso. Esaki ta politiconan cu no por asumi nan rol y cu ta goberna a base di miedo. Nan ta coopera den maldad cu otro.”
