Tabata diahuebs pa mas o menos 10:30 pm ora cu un polis riba motorcycle a topa cu un auto coriendo masha iresponsabel su dilanti. El a duna ordo na chauffeur di e auto marca Toyota, modelo Yaris, color blauw, numera A-69855, pa para. Pero ora a bay controla, a topa cu un auto cu cinco hende muhe rabia aden.
Ta trata aki di turistanan cu tabata riba un trip. Nan a papia masha fresco cu e defensor di ley, pa cual el a pidi pa refuerso na e sitio, entre Marriott y Ritz Carlton Hotel.
A atende cu e chauffeur, riba su forma di stuur, etc. Pero e polis no tabata haya chens mes pa atende cu e chauffeur pasobra e amiganan tabata insult’e na un forma baho. Na momento cu mas polis a yega, a baha e damanan di auto y a detene dos di nan. Un di tres a cuminsa falta respet y a deten’e tambe. Ora a bay hinca e di tres den transporte policial, e dos otronan a cuminsa lanta cu e polisnan, a scop nan den cara mientras un a lanta para, hisa su blusa y mustra e polis su pechonan.
Cu e comportacion aki probablemente nan lo ta bou influencia di un of otro substancia. E tresnan deteni a bay ward’i Shaba pa ey presenta nan dilanti un sub-fiscal pa dicidi riba nan encarcelacion of si ta manda nan hotel bek. Ta cuestionabel si cu nan ta stuur un auto cu A-nummer, mustrando cu varios compania di huur auto awo ta sea huur auto clandestino sin paga belasting of ta casnan di airbnb cu ta inclui un auto den e huur, sin cu ta paga impuesto pa esaki. Bale la pena pa DTP investiga e fenomeno aki y duna multa na esnan cu ta burlando di nos leynan y ta evadi impuesto.
