Shonnan ban cuminsa cu bisa “petje af” pa Team Snor! E motor incansable tras di organisacion “super smooth” di Team Snor, esta Snor Perez, a bolbe percura pa un tremendo y exitoso torneo di fin di aña “Nos cu Nos” na e unico y exclusivo Domino Square Garden na mundo, esta 99 Bar & Restaurant na Calabas/Kudawecha.
Full e aña aki Team Snor a move manera nan ta bisa “een goed geoliede machine”, ya cu di 10 wega hunga e aña aki Team Snor tin 9 gana y 1 perdi! Juffrouw na school antes lo a bisa “ga zo door” y e schrift lo ta yena cu plakprentjes!
Den winner’s round Nelson cu Richard ta tumba Nacho cu Jeffrey abou, Lola cu “Dr. Han” ta pone Stanly cu Wilson trompica, y Snor cu Raffi ta duna Piero cu Dr. Tico un “one-way-ticket” pa loser’s round! Dr. Tico kermen nan a “sinti” e snor pasa caminda no mester a pasa! Siguientemente Nelson cu Richard ta retira Lola cu Han ya cu e ora ta yegando pa Han drenta cushina prepara snacks. N’e otro mesa Atalo cu Kennedy ta mustra Snor cu Raffi e entrada di loser’s round. Por ultimo Nelson y Richard ta retira Atalo y Kennedy pa asina nan bay sinta warda comfortablemente ariba e duo cu lo sali sobrevivi e massacre den loser’s round, pa enfrenta nan den e gran final!
Den loser’s round Piero cu Stanley a hiba un lucha baliente pero na final mester a baha cabes pa Atalo y Kennedy, kende nan di e forma aki a classifica p’e gran final, unda despues di un bon bataya mester a reconose nan superior den e duo di Nelson y Richard! E evento aki a start pa 1’or di merdia y a caba te den ora laat di anochi ya cu e bataya tabata sumamente duro y ningun sapato blanco a cay! Na final di e torneo full bario di Calabas y Kudawecha por a reconose e stem di Nelson, ya cu henter e torneo el a …. wel, ban bisa cu el a “pep talk” su patna Richard constantemente. Pero manera nan ta bisa na Hulandes, “eind goed, al goed” y tantisimo “pep talk” nan ya ta lew den pasado. Pues Nelson Gomez y Richard Heyliger campeon indiscutibel di e famoso wisselbeker “Nos Cu Nos’, y como sub-campeon e duo Atalo Winklaar y Kennedy Hart.
Team Snor a bay style di “all out” e dia aki den nan celebracion y tabata style di open bar, acompaña p’e tremendo ham di pasco y snacks di Dr. Han. Sinembargo ora Snor a bay paga e cuenta, e no a ripara e letter chikito nan abou cu ta bisa “ZOZ” na Chines, y sin sa a paga e “eerste bladzijde” so di e cuenta! Un yamada di “incassoburo 99” a drecha cuenta e siguiente dia bou harimento y hilaridad di un y tur envolvi.
Snor kier a duna un palabra grandi di danki na full su team pa nan excelente comportacion, cooperacion, y actuacion den 2018. Tambe un palabra grandi pa Dr. Han di 99 Bar & Restaurant pa tur locual el a hasi pa nan, y tambe muy en especial na Dewars y Balashi pa nan tremendo patronisacion di e torneo anual di fin di aña, Nos cu Nos! Di parti di Team Snor, bon pasco, feliz dianan di fiesta y feliz y propero 2019!
