Alwyn Stockdale a confesa di a abusa sexualmente di un mucha di 10 aña den e Palacio di Buckingham, na Reino Uni y di un otro menor di 14 casa den e cas di e famianan di e menor.
Pero e delito lo a keda sin wordo castiga, debi cu e ex chauffeur di Reina Elizabeth a fayece den un hospital di London siman pasa na edad di 81 aña, prome cu por a acus’e formalmente.
E atrocidadnan a sosode entre 1972, tempo cu Alwyn Stockdale a cuminsa traha como chauffeur di e Palacio y 1975, segun cu por a desprende di un investigacion haci pa e corant Britanico “The Sun.”
Ministerio Publico Britanico a ricibi e denuncianan na Augustus y a dicidi presenta e cargonan, pero Stockdale a fayece di causanan natural prome cu por a haci esaki.
Segun Alwyn Stockdale a splica, e relacion cu e tabata tin cu e menornan di edad, tabata di consenso propio.
E denuncia a wordo haci pa un homber di entre 50 y 60 aña di edad, ora cu e ex chauffeur ainda tabata biba dentro di e palacio real.
E otro agresion sexual a tuma luga den e cas di un compañero di trabao di Alwyn Stockdale.
“Despues di un investigacion di Polis Metropolitano riba e denuncianan di abuso sexual den e casonan cu no ta reciente, CPS (Crown Prosecution Service, e Fiscalia Real, a cargo di procesonan hudicial na Inglatera y Wales), a autorisa cuater cargo contra un sospechoso di 80 aña,” Ministerio Publico a indica na BBC.
“E sospechoso a fayece ya e momento ey, y por lo tanto no por entama ningun proceso legal,” e declaracion a añadi.
E hecho a causa un gran escandalo den Reino Uni y den e Corona Britanico, cu den su ultimo convocatorio di trabao pa cubri e posicion di chauffeur a ofrece un salario di 28 mil dollar pero mester conta cu un rijbewijs di Reino Uni y experiencia como chauffeur, sa traha den ekipo, pone atencion na detaye y ta cla pa mantene calma bao di presion, entre otro.
