Parlamentario Mervin Wyatt-Ras ta trece su preocupacion un biaha mas padilanti pa loke ta trata e cantidad di casonan di COVID 19. A manda pregunta pa minister Dangui Oduber, sin embargo Wyatt-Ras no a ricibi contesta. Wyatt-Ras a tuma nota di declaracion di Edwin Jacobs di SVb y AZV encuanto pashentnan manda pa Colombia. Cada pashent, segun Jacobs, ta costa 50 mil florin y a manda 12 caba, mustrando asina e impacto cu tin riba e fondo, nificando cu si keda manda mas pashent den exterior, ta crea mas gasto cu a premira pa e fondo di AZV.
Tisa La Sorte di AHATA a trece padilanti cu hotelnan ta raportando cu ta sigui ricibi cancelacion debi na e nivel cora cu Aruba ta aden actualmente segun CDC. Aki por mira e impacto cu e cantidad di casonan tin riba nos pilar economico di mas grandi. E cifranan di DVG ta indica cu tin un total di 97 caso nobo di COVID-19 registra, di cual 1 ta turista y 96 ta residente. E cifranan aki ta representa un ‘Positivity Rate’ bou di e residentenan di 26%. E cantidad di caso activo di COVID pa awe ta 1057 y e cantidad di fayecido a aumenta na 124 cu fayecimento di 2 residente y un turista di cual nan edad ta varia entre 63 cu 65 y ningun tabata vacuna. Tin un aumento di casonan nobo cu un average semanal di 105 caso pa dia y un average di ‘Positivity Rate’ semanal di 27% pa dia.
Preocupante ta alabes cu tin actualmente 70 persona interna cu COVID den Hospital di cual 8 ta den ICU na Aruba, 13 den ICU na Colombia, 47 riba piso general na Aruba y 2 riba piso di maternidad na Aruba. A base di loke ta menciona, Wyatt-Ras ta cuestiona e maneho di gobierno al respecto. Mirando e cantidad hopi halto y creciente di e casonan y fayecimento, e gastonan halto tanto di hospital como di Colombia, e scarsedad di e profesionalnan medico y di enfermeria, e parlamentario ta puntra su mes si Gobierno ta warda te extremo prome cu bin cu mas control riba e reglanan di higiena.
Wyatt-Ras ta constata cu Minister ta enfatisa solamente vacuna sinembargo tin persona cu no ta y lo no vacuna. En bes di bay en contra di e personanan aki y enfatisa solamente vacuna lo mester zorg alabes pa tur e reglanan di higiena ta implementa den tur sentido di palabra y den tur establecimento. No mester warda te ultimo pa bin cu medida drastico. Ta necesario mas estimulo y control si ta implementa medida di higiena. Un djis ora scol habri e contagio lo por aumenta mas ainda. Pa e muchanan bou di 12 aña cu no a vacuna, e medidanan di higiena lo ta sumamente importante pa controla.
Wyatt-Ras ta mira y ta acerca door di e ciudadanonan cu ta preocupa pasobra ta constata cu ainda tin hopi ciudadano cu no ta tuma distancia social ni ta bisti tapa boca. Sabiendo cu aunke cu un persona ta vacuna e por contagia y transmiti e virus pa otro persona ta di importancia pa mas ainda enfatisa medida di higiena banda di vacuna. Wyatt-Ras ta haya cu gobierno mester haci un bon evaluacion di su strategianan y no warda ora baca hoga pa bin comanda y tuma medida drastico riba nos pueblo. Wyatt-Ras ta spera alabes cu cada ciudadano por carga responsabilidad y proteha, no solamente su mes, sino tambe otro. Hunto nos tin cu lucha pa vence e virus devastador aki.
