E Presidente di College Aruba financieel toezicht (CAft) no a spaar ningun comentario na Minister di Finansa, Asuntonan Economico y Cultura di Aruba, esta mr. Xiomara Maduro, relaciona cu cumplimento cu recomendacionnan di CAft na Gobierno di Aruba. E hecho cu no a cumpli y den un carta e mandatario di Aruba a manda pa nan, e no a duna ningun indicacion di tin intencion di cumpli tampoco, a haci cu a bin un carta pisa. Den e carta CAft ta bisa Aruba, sea Bo ta cumpli den 8 dia, sino lo informa Conseho di Minister di Reino pa tuma medida, cu por ta entre otro un “aanwijzing” pa Maduro.
E retonan cu Gobierno ta confrontando ta entre otro reduccion di gastonan di personal, manera e Minister di Finansa di Aruba mes a acorda den un protocol na november 2018. Awor cu no ta cumpli y no ta duna indicacion con ta baha e gastonan di personal mas ainda, ta haci e situacion mas dificil pa Gabinete Wever-Croes. Esaki sin conta cu na otro banda sindicatonan dunando ultimatum pa sinta riba “indexering” tambe.
Mas leu, e colegio di supervision, den su carta, ta pidi Gobierno pa presenta un plan integral di mas aña relaciona cu e reforma fiscal cu tanto ta papia di dje. CAft kier sa kico e plan ta, cuanto placa adicional e lo aporta na caha di Gobierno, etc. Tambe kier sa ki tipo di impuesto lo reforma y ki tempo cada reforma ta drenta na vigor. Pasobra, Minister Xiomara Maduro a keda di start cu “Sugar Tax” dia 1 di juli proximo, cu lo a aporta na 18 miyon pa aña, pero cu ainda no a cuminsa. Tambe a papia di un impuesto pa Serlimar na hotelnan, a keda di atende cu posibel aumento di BBO of otro tipo di impuesto manera ABB, cu tampoco no a bira realidad tampoco.
Loading...
Reload document 
Open in new tab ‘Ta mas cu obvio cu CAft tambe ta tumando nota cu tur posibel solucion pa aumenta entradanan di Gobierno no ta carga sosten di Minister di Finansa. E ta pidi y ta haya conseho regularmente di IMF y otro institutonan internacional, pero no ta duna oido na e consehonan y como tal ta pensa cu si no haci nada, cu e problemanan lo soluciona nan mes. Di otro banda tur hende ta mira cu ta yenando e aparato gubernamental cu mas hende y cu di un reduccion di gasto no ta mirando net net nada!
Pa cu AZV tambe ta notando un aumento sin control y anticipacion di gastonan. CAft no ta kere cu AZV por keda haya un “open check” asina di Gobierno y cu mester conduci e control y supervision mas rigido eyden riba e gasonan di e seguro medico general. CAft a urgi Minister Maduro pa e convence Minister Dangui Oduber pa eherce mas control den AZV.
Na final di e carta, Raymond Gradus, Presidente di CAft a skirbi Minister Xiomara Maduro cu e presupuesto di aña 2019 mester ta dirigi pa logra un finansa publico duradero y bon balansa. Den e cuadro ey mester cumpli cu e normanan for di articulo 14 di e ley di LAft, cu ta mara tambe na e protocol firma na november 2018. CAft a duna Minister Xiomara Maduro te diabierna otro siman pa cumpli cu tur locual a acorda, sino lo manda informa Conseho di Minister di Reino cu Gobierno di Aruba no ta cumpli cu e normanan. CAft a informa Minister Maduro cu no por descarta cu nan lo conseha Conseho di Minister di Reino pa duna Aruba un “aanwijzing”.
