Canada a converti den e prome pais industrialisa den legalisa e uso recreativo di Cannabis diaranson, aunke cu awo lo bay ta dificil pa haya marihuana legal den e ciudadnan di mas grandi di e pais, manera Toronto y Vancouver, door di falta di tiendanan habilita.
Comercio na Terranova y Labrador, e provincia mas oriental di Canada, a cuminsa cu e prome bentanan legal di marihuana mey anochi.
Mas di 100 persona a reta friu y biento den e capital di e provincia, St. John’s, parando den rij dilanti di un tienda di e marca Tweed di Canopy Growth Corp, e productor di cannabis mas reconoci na mundo.
E presidente ehecutivo di Canopy, Bruce Linton, a bisa cu e prome bentanan autorisa a bay pa Ian Power y Niki Rose. “Mi a sali e anochi aki pa ta e prome persona na Canada den cumpra e prome gram legal di cannabis recreativo pa (…) wak finalmente e fin di e prohibicion na Canada,” Power a bisa.
E dia tabata historico pa e pais, ya cu e Canadesnan adulto por huma marihuana legalmente despues di un prohibicion di casi un siglo. Pero e aprobacion pa awo di e poco tiendanan y e escases di weed suministra na e tiendanan aki, ta haci cu e ta parce dificil, por lo menos na comienso, lo caba cu e black market.
“Lo bay tin hopi celebracion durante di e dia y casi tur lo bay ta cu cannabis ilegal” den e ciudadnan di mas grandi di Canada, Brad Poulos, instructor y expert den cannabis di e Universidd Ryerson na Toronto, a bisa.
“E consumidornan di cannabis recreativo na Canada… simplemente lo sigui cu nan fuentenan di suministro (existente) pa e sistema legal bira up to date.”
Cu tur, e consumidornan Canades por cumpra marihuana legal via internet, for di gobiernonan provincial of minoristanan autorisa, aunke e entrega lo bay tuma algun dia.
Hopi pais cu solamente ta aproba e uso medicinal di marihuana, ta mirando e legalisacion di cannabis pa finnan recreativo na Canada, cu ta cumpli un promesa di e campaña di e prome minister Justin Trudeau di 2015.
E medida tin como obhetivo di kita ganashi for di crimen organisa y regula e produccion, distribucion y consumo di un producto cu miyones di Canades tabata consumi, te awor aki, ilegalmente.
