Pa loke ta trata e necesidad di gobierno pa cu finansas publico, minister di finansa mr. Xiomara Maduro a comenta cu lo trata e ley di loonsubsidie den Parlamento di Aruba. E ley aki ta importante pa motibo cu CAft a pidi tur control necesario, cu a cuminsa desde aña pasa. A base di e control, tur persona cu a haya fondo di mas lo mester paga bek.
Esaki ta sosode na momento cu a indica cu a bay cierto porcentahe atras pero en realidad no t’asina. Pa por cobra bek, lo mester di e ley. E ley aki tambe ta por legalisa e proceso di emergencia di cual gobierno a brinda e asistencia. Den dje, SVb lo haya e autoridad pa por haci e cobransa necesario.
Gobierno a haya fo’i SVb caminda ta indica unda e suma grandi ta, cual a resulta cu ta e hotelnan. Nan lo a indica di tin necesidad di e placa pero na final a resulta cu no tabata asina. E maneho cu lo hiba ta pa cobra tur cu tin un suma grandi na debe pa asina por yuda e companianan chikito cu ta den situacion poco preta.
Minister Maduro a enfatisa cu: “Ta importante pa menciona cu ora e companianan mas tabatin mester tabatin yudansa aki, sin e yudansa aki hopi compania no lo por a opera.” Door cu ta placa di Hulanda nan tin extra control riba dje, di cual CAft a pidi pa cobra e placa aki y intreg’e den administracion di pais Aruba.
COBRA BEK
Durante pandemia varios compania a perde tur entrada y otronan prome cu pandemia tabata suak y no tabata bayendo bon, varios otro cu yudansa mes no por a haci e cambionan necesario pa sobrevivi e pandemia. SVb a indica cu no ta premira cu hopi compania lo cera. Lo enfoca na cobra e companianan cu mas debe en bes di e companianan chikito cu nan debe ta mas abou. SVb a cuminsa cobra caba y ta duna oportunidad di haci un areglo pa paga esaki.
