Diasabra anochi a dirigi Polisnan pa un caso di kiebro y ladronicia den Flacciusstraat na Oranjestad. Ey a topa cu e victima di inicial B.
Segun e señora, e tabata trahando ora cu amigo di su yiu muhe a bel’e pa avisa cu nan a horta den su cas. Mesora el a sali for di trabou pa bay pone su mes na altura di e situacion na su cas.
Ey a constata cu desconocinan a drenta den e cas dor di forsa e porta c’un pat’i cabra y asina logra penetra paden pa despues kibra porta di un camber. A haya tur cos reboltia y buscando su pertenencianan, e victima a ripara cu nan a bay diferente joya di oro, un safe y varios holoshi. Fuera di esakinan tambe nan a bay cu un laptop marca Apple y tambe nan a bay c’un suma di 20 mil florin cu e tabatin den su camber.
Ta remarcabel cu tin un safe den e cas, pero toch a opta pa laga 20 mil florin, cu ta un suma cuantioso di placa, pafo di e safe! Placa efectivo awendia ta forma un peliger pa bo propio siguridad, pa cual semper ta recomenda pa laga placa na banco y paga mas cu ta posibel cu Bo carchi di debito.
Polisnan a tuma tur informacion y a hinca e investigacion den man di Recherche pa purba yega na e ladron(nan) envolvi.
