Un verpleegster contrata pa traha na Aruba na 2020 a demanda Courtyard by Marriott Aruba Resort pa un caida cu el a sufri banda di e pool di e hotel. E kier a tene e hotel responsabel pa su caida y a haci un demanda di no menos cu 168 mil dollar. Sinembargo na final e berdad a sali na cla y Courtyard by Marriott Aruba Resort a mustra cu filmacion cu cos no a bay manera e huesped a conta. Ta berdad el a cay pero no cu e ta responsabilidad di e hotel y mucho menos cu mester bay paga e huesped e suma grandi ey. Al contrario. E demandante mester paga e gastonan cu e hotel a haci pa motibo di a e hinc’e den e caso aki: 11 mil florin.
A cuminsa e caso contra The Mill Condominium Management Co. N.V., cu ta esun doño di e hotel. E persona aki tabata “bibando”, mientras cu e tabata traha na Aruba, den e hotel Marriott desde november, 2020.
E echo mes a sosode dia di Tres Rey, 6 di januari, 2021 rond di 7:30 pm. El a cay banda di e piscina y a kibra su enkel banda robes. El a biaha despues, dia 9 di januari, bek pa Merca. Segun el a informa, mester a opera su enkel dia 13 di januari caba.
Na maart el a dicidi di pone Marriott responsabel pa e consecuencianan di su caida. E tempo ey el a pidi corte declara e hotel responsabel pa su caida y a pidi pa condena nan na un pago di $ 168.350,-, y pago di tur futuro daño material cu e por sufri a consecuencia di e lesion aki.
Hues a analisa henter e situacion, a mira e potretnan, a mira filmacion di camara di siguridad y a analisa henter e situacion. A lesa declaracion di e huesped y su testigo y a compara esaki cu loke ta mira riba e video.
E huesped su ponencia ta cu e trapi tabata defectuoso of ta forma un peligro, ya cu e no ta cumpli cu e exigencianan, cu a causa cu el a cay na dje. A papia cu e awa di pool ta keda riba e stepnan di e trapi, cu no ta traha di un material adecuado. Esta cu e ta suficiente anti-slippery.
Pero na final Corte a conclui cu e fli aki no ta subi.
No por mira cu di berdad tabatin awa para y cu el a slip a causa di esaki. Y e banda cu el a slip, no ta di e banda di e piscina.
Pues hof a bisa cu no por otro cu nenga su peticion pa haya un suma di 168 mil dollar. Pero si e mester paga 11 mil florin di gastonan di abogado di e hotel.
Pa un relato amplio lesa TREMPAN.
