Pa prome bes un pastoor ta subi scenario pa participa den Caiso y Soca. Ta trata di pastoor Jairo y e lo ta compaña pa e banda ‘NFuzion.
Pastoor Jairo Maduro, The Priest, a expresa cu pa basta aña Ofo Escudero ta su tras pa participa den Caiso y Soca. Hopi bes e pastoor ta bisa si e ta of no ta participa, si e ta bay cu tempo, bay training, siña e cantica. Pero Carnaval 70 ta eynan y Escudero un biaha mas a yam’e. E pastoor a acepta y nan a traha e cantica p’e. Nan a manda e cantica pa asina Pastoor Jairo por a cuminsa train y tur momento e ta cant’e.
Como cu e ta un pastoor, tin hende lo expresa nan disgusto na esaki. “Nos ta leu di e limite pa bisa kico no mag di haci. Musica ta cultura,” segun Pastoor Jairo. El a enfatisa di a nace n’e luga aki y semper el a gusta carnaval. Durante su hubentud el a toca den brass band. El a participa den Jouvert y bay den last lap. Pa su persona esaki ta un satisfaccion y e ta sinti asina bon di por diberti, y asina ey duna pueblo algo di alegria.
Cu si e tema lo zona den su misa, e no por bisa. E no ta kere cu e ta haciendo algo malo. E ta un trompetista y ta sirbi Dios cu su talentonan. Casi tur diadomingo e ta toca trompet den misa di protestant. Su sirbishi na Dios ta riba pia.
E ta kere cu e por ta algo straño su participacion, pero diamars anochi, el a sinti cu e tabatin un bon acogida di e grupo chikito cu tabata presente n’e celebracion di dies aña di ‘NFuzion. Pastoor Jairo ta sinti su mes bon door di participa.
