Dia 1 di november 2023 Cuerpo di Bombero Aruba a start cu un klas di no menos cu 12 hoben, interesa pa bira un bombero. E hobennan aki ta tur entusiasma pa pasa door di e curso special aki, den cual ta enfoca hopi riba condicion fisico pero educando riba e tecnica di paga candela y di rescate di bestia y hende.
Remarcabel ta cu despues di 20 aña, cu un dama ta forma parti di opleiding aki. Esneyda Perez tabata e prome y ultimo hende muhe cu a sigui e curso y a bira un bombero. El a sigui curso na Hulanda y a bin sigui na Aruba. Jacky van Putten tambe a yega di bira bombero, pero como boluntario.
Esey, manera a menciona, ta inusual. Pero e biaha aki a haya peticion di un hende muhe y a acept’e den e proceso di reclutacion. E opleiding riba su mes no ta facil pero mesun duro cu e ta pa un hende homber e ta pa e hende muhe tambe.
Pa Cuerpo di Bombero mes, ta despues di varios aña cu porfin un gobierno ta brinda e posibilidad pa por recluta mas bombero. E ultimo klas tabata na aña 2019. E opleiding pa bira bombero ta varia entre 12 pa 18 luna di tempo. Den caso di bomberonan pa ocupa un funcion den “middenkader”, ta desde 2007 cu no a organisa curso pa nan. Te cu aña pasa na augustus a cuminsa un klas di 18 bombero. E cursonan na Aruba ta sosode online den cooperacion cu Stichting Brandweeropleiding BOGO. E aspectonan local ta haya les na Aruba mes pero e parti teoretico mayoria ta for di Hulanda.
Tocante Cuerpo di Bombero
Cuerpo di Bombero Aruba ta existi desde aña 1976, como un departamento independiente. Prome cu esey e tabata parti di e trabounan di Polis. Awendia e ta conta cu como 140 empleado, di cual e mayoria ta traha activamente den combatimento di candela y trabounan di rescate. E empleadonan ta parti den 3 diferente post, situa na San Nicolas, na Aeropuerto y na Tanki Flip.
Pa aña nan ta responde na mas o menos 1600 melding, cu ta varia entre combatimento di candela, rescate, yudansa special y trabounan na aeropuerto. Awendia e cuerpo ta bou encargo di un Management Team, cu ex-polis Emiliano Geerman na cabes.
