Despues di un conferencia di prensa cu a tuma luga na Kazerne di Bombero na Tanki Flip, unda cu minister di husticia Andin Bikker a firma un Memorandum of Understanding cu e compania SADI, diasabra, 16 di Maart, por bisa cu oficialmente Cuerpo Policial tin su helicopter. E helicopter a baha den careda di 1’or y 10 di merdia na General Aviation.
E helicopter ta un Bell 2016 L3 cu tin un motor Rolls-Royce 250-C30P di 650 Takeoff. Su capacidad ta di 6 pasahero mas 1 piloto y tin diferente aparato sofistica pa patruya Aruba su fronteranan. Tambe e helicopter por yuda den caso di emergencia pa transporta persona herida, special ora un persona accidente den cierto area cu ta dificil pa yega cu vehiculo. E empresa ta duna servicio tecnico pa loke ta mantencion y reparacion mirando cu nan tin flota grandi pa duna servicio optimal. Tur loke a menciona di e helicopter ta den cuadro financiero aproba pa Parlamento di Aruba.
Siman pasa Mininister Bikker den compania di Prome Minister Evelyn Wever Croes y Minister di Infrastructura Sr. Otmar Oduber a firma un MOU pa un sistema di radar cu un compania di Norwega. E helicopter su base ta na Kazerne di Bombero na Tanki Flip y alabes Minister Bikker a gradici Sr. Edward de Cuba Commandant di Brandweer como tambe departamento di Aviacion Civil pa nan ayudo cu awe Aruba tin su helicopter.
Awe tardi pa 3’or, lo tin e entrega oficial di e helicopter pa Cuerpo di Polis, cual ta tuma luga na e kazerne di Bombero na Tanki Flip.
