Rotary Club of Aruba a haci entrega di diferente donacion

Rotary Club od Aruba ta organisa diferente fundraising den transcurso di aña. Ehempelnan ta e famoso Fiesta Rotaria den luna di maart y e Golf tournament den luna di november.

E fondonan cu wordo recauda den e eventonan aki ta bai pa diferente fundacion den comunidad. Tin hopi fundacion ta aserca Rotary Club of Aruba pa yudanan y a base di diferente criteria, un comision ta evalua e aplicacionnan cu drenta.
E aña aki a toca turno na Stichting BOB, Stichting Sociaal Fonds Colegio Arubano, Mickey’s Foundation, Fundacion pa Hende Muher den Dificultad, YMCA, SABA y Fundacion Sonrisa.

A reparti 75mil florin entre e 7 fundacionnan aki cu a keda masha contento cu e aporte generoso aki di Rotary Club of Aruba. Cu e fondonan aki cada un di e fundacionnan por sigui eherce nan trabou den comunidad.
Alabes kier a recorda comunidad cu dia 31 di maart proximo lo tin un otro tremendo Fiesta Rotaria den Stadion Guillermo Trinidad unda cu un y tur lo por pasa un dia ameno cu posibilidad di cumpra yen di producto na un bon prijs y alabes gana diferente premio atractivo.

E aña aki un bes mas tur hende por cumpra e rifa di Fiesta Rotaria. Ticketnan ta obtenibel serca e miembronan di Rotary y ta obtenibel tambe den weekend na diferente supermercado unda cu e miembronan lo t’ey presente pa bende e rifanan. Asina ta, nos ta wardabo dia 31 di maart proximo den Stadion Guillermo Trinidad pa nos Fiesta Rotaria 2019!

Comments

comments