Den cuadro di nos dia nacional, Dia di Himno y Bandera, OCA lo bay tin un feria, pero riba dianan 30 y 31 di Maart, a peticion di e cabayistanan mes. Riba diasabra 30, e feria lo cuminsa pa 5’or di atardi cu e cabaynan y riba diadomingo 31 ta cuminsa cu e muchanan pa 4’or di atardi.
Segun Arnold Martinus, presidente di OCA, entrada ta gratis. Nan a haya bon cooperacion di Rancho Bello Amanecer y nan ta contento cu esaki. OCA tin un directiva nobo y ta gradicido na sr. Anthony Irausquin y su famia cu a duna un man den esaki.
E principal ta pa por cuminsa cu e deporte manera mester ta. Sigui foment’e y bay p’adilanti. Tin un team ta trahando hopi duro.
Martinus a splica cu no ta facil pa cuminsa, mirando loke a sosode den pasado. Nan no kier wak den pasado, sino den presente y haci lo maximo, loke e cabayistanan ta pidi.
E directiva aki kier traha cu y pa cabayista.
Martinus ta extende un invitacion. Entrada ta gratis. Ban celebra nos himno y bandera en grande. A haya un bon cooperacion di gobierno di Aruba. Instituto di Cultura a duna un backup grandi. Tambe nan ta gradici e team completo pa e organisacion di e feria aki.
Asina ta pueblo henter bin pasa bo dia na Rancho Bello Amanecer. E rancho ta keda net p’ariba di Rancho Ponderosa na Papaya.
Vicepresidente di OCA, Mairon Wever, a splica cu e actividad aki ta wordo organisa pa tur cabayista bin hunto, pa nan bin exhibi nan cabay y inscribi pa e feria fin di luna.
Diabierna anochi, fuera di e inscripcion na Rancho Bello Amaneceer, tabata pa tur hende pasa un rato ameno cu otro, den compania di famia y amistadnan.
Hopi hende gusta e deporte di equitacion. E tin su publico. E tin hopi aña ta existi na Aruba. Pero ainda no tin un publico grandi, cual ta bringando pa asina mas hende bin. E ta algo hopi sano, hopi dushi pa pasa den famia. Apart cu tin competencia di cabay, e muchanan tambe ta competi. Tur aña tin hopi mucha ta bay competi afo, den competencianan internacional. Cada dos aña tin un mundial, cual semper Aruba tabata tin su representantenan cu ta haci un bon papel y bay cu medaya. Aruba ta hopi respeta pa esey mundialmente. Ta purba di lanta e deporte den e comunidad di Aruba pa nan bin apoya e muchanan y tambe e cabayistanan.
Cabayistanan
Melanie Wever ta un amazona kende a bay varios mundial y a gana oro den cuater di nan. El a cuminsa core cabay cu 3 aña. Awor aki e ta bezig wardando pa e proximo mundial.
Melanie ta hopi entusiasma pa a bolbe. E tabata un tempo afo ta studia. Awor aki el a bin Aruba cu vakantie pa e por sigui den e mundo di cabay na Aruba.
E tambe ta invita pa henter pueblo di Aruba pa bin presencia e feria na Rancho Brillo Amanecer.
