Venezuela a cuminsa su prome dia cu dos presidente, e duelo inedito cu a cambia e panorama politico nacional y cu tambe a sacudi e continente y varios pais di Europa.
Y a haci’e cu e presidente encarga, Juan Guaido, moviendo su piesanan interno pa nombra un gobierno provisional y cu su presidente Nicolas Maduro, golpia pa e gol historico cu diaranson a inglifi e oposicion riba caya.
E soledad di “e yiu di Chavez” a alcansa alturanan inespera ora cu mey anochi di diaranson, ni un alma revolucionario a atendi e yamado di Diosdado Cabello, number dos di e revolucion, pa permanece den vigilia protector rond di Palacio di Miraflores.
“Esey nos lo bay coregi,” e minister Eduardo Piñate a disculpa den television Chavista.
E forsanan arma a manifesta diahuebs su respaldo na Maduro. “Nos ta reconoce como legitimo presidente di e Republica Bolivariano di Venezuela, nos comandante en hefe, e ciudadano Nicolas Maduro Moros. FANB no lo acepta hamas un presidente imponi na sombra di interesnan scur y autoproclama na margen di ley. Chavez ta bibo!”, general Vladimir Padrino Lopez a aclama, rodea di su coleganan di e cupula militar, pa laga sa hopi cla cu nan ta mantene den e bando revolucionario.
“Nos ta aki pa evita un enfrentamento entre Venezolanonan. No ta guera loke ta bay soluciona e problemanan di Venezuela,” el a agrega.
Guaido, for di e semiclandestinidad den cual e ta biba, ta mantene na e momentonan aki combersacion cu distinto factor di e Unidad Democratica, e coalicion opositor, pa conforma su prome gobierno, cu cual e ta pretende haci un diferencia notirio cu e gabinetenan Bolivariano. E dialogonan ta tuma luga cu discrecion, ya cu ta trata di e segundo decision di e presidente encarga, tras di notifica diaranson na e embahadanan pa nan no bandona e pais. Ni kico e gobierno di Maduro bisa.
Entre e gestionnan pa conforma su ekipo di confiansa, el a ricibi un yamada inespera for di Europa. Pedro Sanchez, hefe socialista di e gobierno Spaño, a dicidi pa dal un paso tras di a reuni na Davos, cu e presidente Colombiano Ivan Duque; e Ecuatoriano Lenin Moreno y e Costaricense Carlos Alvarado. “Mi por expresa e lucha cu nos a emprende hunto cu henter Venezuela pa logra un gobierno di transicion y tin eleccionnan liber. Pa esey, e presidente a confirmami tur su respaldo,” Guaido a publica riba su rednan social.
E Parlamento Venezolano ta sigui ricibi apoyo, tnto p’afo como den e pais mes. Bandera Roja, partido Marxista cu a bandona Unidad Democrtica, a invita forsanan arma pa reconoce Guaido como presidente interino di Venezuela.
Precisamente a solicita medidnan cautelar pa e proteccion di e dirigente opositor den e comision interamericano di Derechonan Humano. E enorme marea humano na Caracas a supera tur e expectativanan, riba un miyon di persona. Esun mas grandi cu por corda, incluyendo un riu di persona cu a yega for di e barionan popular. Pero no tabata e unico di e oposicion; otro 60 a tuma luga den henter e pais. En cambio e concentracion Chavista tabata incapas di mobilista algun mil, apesar di e presion riba e funcionarionan publico y na e uso y abuso di e makinaria di estado. Un di esunnan mas tristo cu por corda.
